Bullubloggsíðan hennar Lilju

10 ára gella

2005-01-17T08:11:00.000+01:00

Já svei mér þá. Hún Elísa Auður varð 10 ára s.l. föstudag (14. janúar). Hugsa sér að það séu 10 ár síðan hún fæddist, þetta er ótrúlegt. Það er bara alls ekkert langt síðan ég fékk þessa litlu skvísu í fangið fyrst, ekkert langt síðan ég var að labba með hana í kerru niður á tjörn að gefa öndunum brauð, örstutt síðan hún lærði að hjóla án hjálpardekkja, bara nokkrar sekúndur síðan hún byrjaði í skóla... jahérna hér. Svo er þetta bara að verða unglingur, híhí, eða svona næstum því. Já, ég á stóra og myndarlega stelpu, þarf bráðum að fara að fá mér haglara til að reka óþekka stráka í burtu frá henni :Þ

Elsku afi minn.

2004-12-19T21:02:00.000+01:00

Elsku afi minn.

Hann afi minn elskulegur dó á föstudaginn. Hann var orðinn mikið veikur en þurfti sem betur fer ekki að þjást lengi. Hann var líka með húmorinn sinn skemmtilega alveg þar til undir lokin, ótrúlegur alveg. Ég er ekki alveg búin að meðtaka þetta held ég, það er líka svo erfitt að vera hér langt í burtu í útlöndum. En ég og Elísa ætlum heim á annan í jólum og fara í jarðarförina. Mér finnst það bara svo nauðsynlegt að geta farið og kvatt hann á þann hátt, líka fyrir Elísu. En mikið var maður nú heppinn að eiga svona góðan og skemmtilegan afa, gott að eiga margar góðar minningar um hann ;)

Hjálpi mér öll heilög hamingja :S

2004-12-06T01:25:00.000+01:00

Jesús, ég fór áðan niður að læsa útidyrahurðinni, fór svo upp og skellti mér í bað. Þá heyri ég þesi þvílíku læti hér fyrir utan, öskur og ég veit ekki hvað. Rýk upp úr baðinu og kallinn kemur inn á bað til mín og tilkynnir mér að það séu fullt af vopnuðum lögregluþjónum úti í portinu hjá okkur. Með hjálma og byssur og alles. Byssum beint að öllum gluggum og dyrum hjá nágrannanum, þar sem þeir svo brjóta upp hurðina og draga hann út og handjárna og hann svo færður í burtu í lögreglubíl stuttu síðar. Þeir eru svo eitthvað að brasa þarna inni og koma út með eitthvað vöðlað inn í dagblað, setja það í skottið á öðrum lögreglubíl og fara svo.

Kræst, ég er bara í sjokki hér, skelf og titra hreinlega. Fyrst þeir mæta hér í fullum skrúða með vopn og allar græjur þá getur þetta ekki hafa verið eitthvað minniháttar mál, þeir hljóta að hafa grunað hann um að vera með vopn.

Sjitt, eins gott að ég var búin að fara niður og læsa þegar þetta gerðist og eins gott að það varð ekkert skotdrama úr þessu. Almáttugur, og hér á maður heima.

Þessi nágranni hefur nú alltaf virst saklausasta grey, en hann á sko mjög dularfulla vini sem okkur hér hefur verið ansi illa við. Hvað í andskotanum ætli hafi gengið á eiginlega, hvað ætli hann hafi gert??? Fokk!!! Ég ætla að tala við leigusalann við fyrsta tækifæri og spyrja hvort þessi maður muni búa hér áfram, er sko EKKI vel við það með þrjú ung börn á heimilinu.

Þá hefur maður tekið þátt í bíómynd, enda var þetta þokkalega óraunverulegt eitthvað, veit ekki alveg hvernig mér líður, skjálfandi og titrandi með hjartslátt og guðs lifandi fegin að Elísa fékk að gista hjá vinkonu sinni akkurat í nótt og þurfti ekki að upplifa þetta. hin tvö sváfu sem betur fer þrátt fyrir lætin.

Úff, ætla að reyna að róa mig aðeins niður.

2004-11-27T18:25:00.000+01:00

Hvar annars staðar en í Bandaríkjunum sér maður þetta?

Hjalti töffari

2004-11-19T09:27:00.000+01:00

Ekkert smá flott húfa :Þ

Hmm!

2004-11-18T19:34:00.000+01:00

Sá þetta á blogginu hennar Sillu. Er ég í klíku? Hvaða klíka er það þá? Hehe ;)

Whats does your personality rate from 1-10? by morning_prayer
Your first full name
Your personality rates a	ten
your best quality is	youre pretty inside and out
your worst quality is	youre in a clique'
this is because	Of the people you hang around

Quiz created with MemeGen!

Vetur í Noregi

2004-11-18T18:43:00.000+01:00

Hér er snjór og fallegt veður, en kalt. Nú fer sko frostið að koma. Það er rúmlega 8 stiga frost núna, en hér fer nú frostið léttilega í 15-20 gráður og stundum alveg niður í 30. Hins vegar er sjaldan svona mikið rok eins og á Íslandi. Það var verið að opna Europris pluss verslun hér og þar er hæt að kaupa allskonar ódýrar vörur, risaverslun sko ;) Keyptum fínan kuldagalla á Hjalta á 300 kall norskar (rúmlega 3000 íslenskar) og kuldaskó á Elísu á 130 kr (sem sagt um 1500 kr íslenskar). Bjöggi er búinn að setja vetrardekkin undir bílinn svo þar er allt í fínu lagi. En snjóþotur barnanna finnast hvergi :S Skil ekki hvað hefur orðið af þeim. En jájá, það má þá kaupa nýjar við tækifæri.

Annars er ég bara slöpp og kvefuð, ekkert gaman. Með stíflað nef, rennandi hor og dúndrandi hausverk. Ég gat ekki einu sinni sofið í rúminu mínu í nótt, flúði fram í stofu og náði að sofna í sófanum, en þar gat ég allavegana verið með hærra undir bakinu og höfðinu, ferlegt ástand bara. Er þó aðeins að skána núna. Svo er ég með svo mikinn varaþurrk af því að anda með munninum, en ég get allavegana andað með nefinu núna ;)

Ég er að komast í jólaskap, það verður svo jólalegt með þessum fallega snjó. Hann sest á trén og skreytir þau svo skemmtilega. Ég hlakka bara til að fara að gera fínt hér heima og setja upp jólaskraut. Fyrsti í aðventu er nú 28. nóvember, þá langar mig að vera búin að skreyta smá ;)

Óáttaðar mýflugur

2004-11-04T10:16:00.000+01:00

Þessar mýflugur hér hljóta að vera orðnar verulega kalkaðar, eða a.m.k. ein þeirra. Hún er ekki búin að átta sig á því að það er kominnn NÓVEMBER og hún ætti því að vera dauð. Nei, nei, helvítis kvikindið heldur bara að það sé enn sumar og er búin að bíta mig þrisvar í andlitið og einu sinni á handlegginn. Rosalega er þetta eitthvað týpískt. Ég að fara á djamm á föstudaginn, sem gerist sárasjaldan, og þá loks þegar ég fer verð ég með mýflugnabit á kinninni og á bullandi túr... æði!

Alltaf veikindi :S

2004-10-29T22:19:00.000+02:00

Sko, s.l. laugardag ældi Arna alveg hrikalega mikið, samt bara einu sinni, og svo var það bara búið. Á þriðjudagskvöldið ældi Hjalti álíka mikið, reyndar tvisvar, og svo var sú pest búin. Í gær var Arna að drepast í maganum og var svo með niðurgang alla nóttina og aðeins í dag, en er orðin nokkuð góð núna. Svo fannst mér Hjalti grunsamlega syfjaður yfir teiknimyndunum áðan og ákvað að mæla hann... og hann var með rúmlega 39 stiga hita. En Elísa er hress og spræk að vanda ;)

Algjört krútt :D

2004-10-28T01:44:00.000+02:00

Hrikalega sætur, bara alveg eins og í teiknimyndunum ;D

Broddi ;)

2004-10-28T01:42:00.000+02:00

Litli gesturinn okkar í kvöld. Fékk fljótlega nafnið Broddi ;)

Lilja pæja

2004-10-24T23:00:00.000+02:00

Svona er ég í dag (reyndar í gær :Þ)

Smá blaður bara

2004-10-23T22:28:00.000+02:00

Horfðum á þrusugóða mynd í gær, Gothica. Ég hef voða gaman af svona yfirnáttúrulegum myndum sem kunna að halda sér innan markanna og ekki verða of klikk ;) Mjög spennandi.

Annars er svo sem ekkert nýtt að frétta. Allir eru frískir og hafa það gott. Undur og stórmerki reyndar að Hjalti sofnaði án vesens, ótrúlegt bara. Elísa og Arna eru inni í herberginu hennar Elísu að horfa á "bíó". Þær gera þetta stundum að kúra sig svona saman á föstudags- eða laugardagskvöldi og horfa á einhverja skemmtilega mynd inni hjá Elísu með popp og kók ;)

Ég er alltaf á mínu megrunarfæði og gengur bara mjög vel. Satt að segja hef ég ekki verið jafnlétt og ég er núna síðan 1995 þegar ég var nýbúin að eiga Elísu. Öfugt við hinar meðgöngurnar grenntist ég nefninlega þegar ég var ólétt af Elísu (þyngdist svo á brjóstagjöfinni, en það er önnur saga) Ekki er ég nú orðin grönn samt, en þetta er góð tilfinning ;) Styttist óðum í kjörþyngd.

Jæja, ætla að fá mér smá sykurlaust nammi og glápa á "Return of the mummie" sem verið er að sýna í sjónvarpinu.

Farðu að sofa!!!

2004-10-20T14:54:00.000+02:00

Þetta er eitt mesta skammaryrði sem sonur minn getur notað. Ef hann er reiður við mig þá rekur hann puttann framan í mig , horfir á mig grimmum augum og segir reiðilega: FARÐU AÐ SOFA!!! Hmm, hvers vegna skyldi það vera?

Helgin

2004-10-15T18:15:00.000+02:00

Jæja, tengdapabbi er búinn í þræðingunni, sem gekk bara mjög vel. Þetta var sem betur fer minna en læknarnir bjuggust við og kallinn er kominn aftur á spítalann á Akranesi. Hann átti jafnvel að fá að fara heim í dag, en við erum ekki búin að heyra hvort það hafi orðið eða ekki. Vonum það bara ;)

Annars var ég á næturvakt s.l. nótt og tek þrjár í viðbót í þessari törn. Vaktin í nótt var bara fín, mátulega mikið að gera. Vonandi verða hinar svona líka.

Elísa er að fara í skátaferðalag á morgun. Ég fór með henni áðan að versla nesti og regngalla sem hana vantaði. Þau gista í skátabústaðnum eina nótt og það verður örugglega svakalega mikið stuð hjá þeim ;) Jæja, ætli ég verði ekki að fara að pakka fyrir hana.

Það sem þetta net er stórkostlegt :D

2004-10-14T01:36:00.000+02:00

Ég er bara svo alldeilis ótrúlega hissa og ánægð. Fékk kveðju í gestabókina á átaksblogginu mínu frá gamallri vinkonu... eða sko ungri auðvitað... sem ég hef ekki heyrt í í mörg ár bara held ég. Svo rambar hún á síðuna mína, alveg brilliant. Ég er svo óþolinmóð að heyra fleiri fréttir af henni að ég er búin að senda meil, fylla bloggið hennar af kommentum og þar að auki skrifa í gestabókina hennar. Ætla rétt að vona að hún hafi samband aftur, annars á ég eftir að leggja hana í einelti á blogginu hennar, hahaha. Æ hún er bara svo frábær, á ekki von á að hún hafi breyst neitt hvað það varðar :D

En leiðinlegu fréttirnar eru þær að tengdapabbi var lagður inn á spítala í gær með hjartavesen, líklega kransæðastíflu. Fór í einhverja rannsókn á sjúkrahúsinu á Akranesi í morgun og verður svo fluttur í bæðinn á morgun og fer þá í aðgerð... ætli það sé ekki hjartaþræðing. Held að þetta sé nú ekki neitt alveg svakalega alvarlegt, en nógu alvarlegt samt. Vona bara að þetta gangi allt rosalega vel hjá honum, mér þykir svo óskaplega vænt um þessa yndislegu tengdaforeldra mína. Þeir minna mig oft á foreldra mína... og það eitt ætti að nægja til að þið vitið hvað mér finnst þau frábær :D

BÖRN!!!

2004-10-10T22:38:00.000+02:00

Hvaðan fá þessi börn mín þessa þrjósku? Þau eru sko ekkert að fara að sofa. Hjalti liggur t.d. bara inni í rúmi með eitthvað dót og er að leika sér og syngja, sem er stór framför frá því fyrir 10 mínútum, því hann liggur allavegana í rúminu :S Reyndar held ég að Arna sé LOKSINS dottin út af, en hún er búin að vera blaðrandi eins og hún fái borgað fyrir það. Dah!

Sitt lítið af hverju

2004-10-07T23:35:00.000+02:00

Ég var að horfa á svo skemmtilega mynd, Lady Killers, hló vel að henni ;) Tom Hanks er alveg brilliant karakter þarna. Mæli með að þið sjáið hana ef þið eruð ekki búin að því.

Í gær var brjálað þrumuveður hér. Ég vaknaði upp klukkan hálffimm um morguninn við þvílíku lætin. Glæsilegir blossar og magnaðar drunur. Svo buldi rigningin á húsinu inn á milli og í eitt skiptið kom svakalegt haglél með risastórum höglum. Mér hefur alltaf fundist þrumuveður svo heillandi, finnst eitthvað stórkostlegt við það. Líklega bara lotning fyrir náttúrunni. En þrumuveður eru ekki bara skemmtileg svo sem. Fengum einmitt inn einn sjúkling á deildina þennan sama morgun, en þá hafði eldingu lostið niður í húsið hennar og kveikt í. Fyrir tilviljun hafði hún tekið gemsann sinn með sér inn í svefnherbergi til að nota sem vekjaraklukku, sem hún gerir annars ekki. Sem betur höðu krakkarnir hennar fengið að gista annars staðar þessa nótt, þar sem þau voru í haustfríi í skólanum. Þegar hún vaknaði var allt fullt af reyk og hún sá ekkert og gat ekki opnað hurðina fram, því þá fyllist bara allt af reyk. Fann sem betur fer gsm símann og gat hringt eftir aðstoð og henni var náð út. En hún er með einhverja reykeitrun og þarf að vera undir eftirliti á spítalanum í nokkra daga. Og ég er ekki að brjóta neinn trúnað með því að segja þetta hér, því það kom viðtal við hana í bæjarblaðinu í morgun þar sem hún sagði frá þessu öllu ;)

Allir eru sem betur fer orðnir nokkurn vegin frískir, smá hósti í einhverjum enn samt. Vonandi verður enginn veikur þessa helgi, 7-9-13 (fyrir Gabby).

Já og vitiði bara hvað. Ég er búin að endurheimta hann Jim e-mail vin minn. Ég var einhvernvegin svo viss um að e-mailið hans væri ekki lengur í notkun og að hann væri fluttur. Nema svo dettur mér í hug að prófa samt þetta gamla e-mail, og viti menn, hann svarar bara medesamme... og er enn með sama heimilisfangið líka. Svei mér þá. Ég hafði ekki heyrt í honum í 3 ár. En það var sko frábært að finna hann aftur :D

Þetta voru Noregsfréttirnar í dag ;)

En mamma...

2004-10-04T11:30:00.000+02:00

Já, elstu dótturinni fannst sko móðir sín ekkert skemmtileg í dag. Stúlkan var búin að klæða sig og ætlaði sko bara að drífa sig á bókasafnið með vinkonu sinni (haustfrí í skólanum). En hún gleymdi bara alveg að hún var með 39 stiga hita í gær. Þannig að hún var sko ekki sátt við að mamman bannaði gönguferð á bókasafnið í grenjandi rigningu, hún væri sko HITALAUS. En mamman gaf sig ekki og hélt því blákalt fram að fyrst dóttirin hefði verið svona lasin kvöldið áður væri ekki tímabært að leggja í langferðir í leiðindaveðri.

Nú jæja, skvísan fékk þó leyfi til að skreppa til vinkonu sinnar, sem býr rétt hjá. Með því skilyrði að þær væru ekki úti að þvælast. Þar sem Elísa er náttúrulega ofurhetja, eins og svo margir aðrir á hennar aldri, ætlaði hún að sjálfsögðu út bara á flíspeysunni. Það heyrðist því mikið EN MAMMAAAAAAA þegar vonda móðirin heimtaði að hún færi í úlpu. En að lokum fannst úlpa og stelpugreyið slapp burt frá þessari leiðinlegu mömmu.

Nú ætlar leiðinlega mamman að eyða smá kvolití tæm með yngri dótturinnni, en sá kvolití tæm er þannig að mamman leggur sig í sófanum og dóttirin situr hjá henni og horfir á teiknimyndir. Mjög fínt fyrirkomulag og allir sáttir :Þ

Já, hún Karin vinkona er loksins búin að eiga. Það fæddist stór strákur klukkan hálfsjö í gærkvöldi, eftir 17 tíma puð. Hann var 16,5 merkur og 51 cm og er búinn að fá nafnið Sigurd ;) Hlakka til að sjá hann.

Ég meina það

2004-10-04T03:48:00.000+02:00

Arna er aftur komin með hita og ég held bara svei mér þá að ég sé líka lasin. Er með nefrennsli og brjálaðan hnerra, illt í hausnum út frá nefinu og með svona hitafíling :( Hvað er að gerast???

Síðasta vígið fallið

2004-10-03T19:25:00.000+02:00

Elísa Auður er orðin veik. Þá eru allir í fjölskyldunni búnir að fá þessa pest :/

Næturvakt

2004-10-01T21:41:00.000+02:00

Var á næturvakt s.l. nótt. Held reyndar að ég hljóti að hafa villst og lent á vitlausri deild. Er handviss um að ég var ekkert að vinna á lungnadeildinni í gær, þetta var sko örugglega geðdeild.

Þetta var örugglega bara kall á athygli

2004-09-30T03:19:00.000+02:00

Hafiði ekki heyrt þetta sagt þegar einhver er að tala um eða hóta sjálfsmorði? Hún gerir þetta aldrei, þetta er bara athyglisþörf... þetta er bara hróp á hjálp... þetta er bara...

Stundum finnst mér þetta hljóma eins og það sé einhver svakalegur aumingjaskapur að hóta sjálfsmorði en ætla sér í raun ekki að standa við það. Stundum mætti halda að fólki finnist það meira virðingarvert að standa við það að drepa sig, fyrst maður var að hóta því... annað er jú BARA athyglisþörf. Svo gleymir fólk nú líka að hugsa út í það að sumar svona ATHYGLIS-sjálfsmorðstilraunir takast nú bara ansi vel, einmitt af því að fólk hugsaði að þetta gerir hann aldrei, þetta er bara hróp á athygli.

Já, kannski, og VONANDI, er það þannig, því það er mun alvarlegra ef fólk virkilega ætlar sér að binda endi á líf sitt. En ef þessum athyglisköllum er aldrei sinnt, þá getur það vel endað með að viðkomandi einmitt taki líf sitt, þó það hafi í raun ekki verið ætlunin. Fólk er ekki að kalla á athygli með þessum hætti nema því líði verulega illa á einhvern hátt.

Þannig að það á alltaf að taka sjálfsvígstali alvarlega, það gæti kannski bjargað einhverjum, þó svo að þetta hafi BARA verið athyglisþörf.

Sokkaskrímsli eru raunveruleg

2004-09-29T02:47:00.000+02:00

Hvað er þetta með sokka eiginlega??? Ég keypti tvö pör handa Hjalta um daginn, tvö handa Örnu og heil FIMM handa Elísu. Eitt parið hans Hjalta hvarf strax, ÁÐUR en hann nokkurn tíman notaði þá. Finn eitt heilt par og einn SOKK af Örnu sokkum, og af Elísu sokkum finn ég líka eitt heilt par og einn sokk... af FIMM pörum!!!!! Þetta er frekar pirrandi. Sokkarnir af þessum krökkum gjörsamlega hverfa. Mér finnst ég alltaf vera að kaupa nýja sokka á þau, sérstaklega Elísu. Hvað ætli það hafi horfið mörg sokkapör af henni eiginlega? Ég er farin að trúa á sokkaskrímsli, engin önnur útskýring á þessu.

Ótrúlegt

2004-09-28T18:42:00.000+02:00

Arna og Hjalti eru ekki að slást og rífast. Þau sitja bara svo góð inni í herbergi og eru að kubba. Hvað er í gangi?

Annars er ég bara kvefuð og slöpp. Þó skárri en í gær. Blöööö hvað mér leiðist eitthvað að vera svona.

Uppgefin

2004-09-25T21:00:00.000+02:00

Stundum er bara erfitt að vera móðir, húsmóðir, eiginkona og útivinnandi, og eiga að standa sig í öllum þessum hlutverkum. Nú er ég hreinlega þreytt og uppgefin, en maður má það ekkert, verður bara að halda áfram. Get þó ekki sagt að ég sé neitt að brillera í þessum hlutverkum í dag.

Gamlar bíómyndir

2004-09-24T01:01:00.000+02:00

Þær eru alveg stórkostlegar, híhí. Tónlistin er svo geggjuð, alltaf þessar æpandi fiðlur og önnur strengjahljóðfæri í crecendo þegar eitthvað spennandi eða ógnvekjandi er í uppsiglingu. Ef myndirnar eru í lit þá eru þessir litir alveg yndislegir. Eitthvað svo sterkir og hreinir, eiginlega alveg í stíl við litina á bílunum frá þessum tíma. Svo er það þetta allra besta, en það eru ópin í kvenfólkinu. Það hljóta nú að flokkast sem sérstakir hæfileikar að ná svona yfirmáta skerandi, kvenlegu öskri :D Bara frábærar þessar myndir sko ;)

Lítill lasarus :(

2004-09-23T22:49:00.000+02:00

Arna rauk bara upp í 40 stiga hita í kvöld. Hún er búin að vera hóstandi í nokkra daga, en nú er hún orðin "ordentlig" lasin greyið. Hún sefur núna, en ég heyri hana samt brölta og hósta og stynja inni í rúmi :( Litli anginn minn. Vonandi batnar henni fljótlega.

Gestahæft

2004-09-23T01:16:00.000+02:00

Það er svo gaman þegar heimili manns er bara alltaf gestahæft. Alveg ótrúlegt bara hvað þessar 20 mínútur á dag hafa breytt öllu... verst að það koma bara engir helv... gestir >:(

Mig vantar bækur

2004-09-20T02:12:00.000+02:00

Einu sinni var sú tíð að ég fékk margar bækur í jólagjöf og hafði alltaf nóg að lesa. Svo fór þeim að fækka og að lokum fékk ég bara enga bók í jólagjöf. Jú, ég hef nú einstaka sinnum fengið einhverja bók um jólin, en það er mjög sjaldan. En nú er svo komið að ég er búin að lesa allar bækurnar mínar svona 370 sinnum, hverja þeirra, og ég bara þori varla að lesa þær oftar af ótta við að þær muni hreinlega detta í sundur vegna slits og álags. Þannig að ef einhver á bækur aflögu þá má sá hinn sami senda mér þær hingað út. Sendið mér bara e-mail og ég skal láta ykkur fá adressuna.

Eða kannski maður ætti bara að fara á bókasafnið :S

Sigga afa-svipur ;)

2004-09-20T02:09:00.000+02:00

Smellið bara á myndina til að sjá hana betur ;)

Já, ég þóttist sjá einhvern Sigga afa-svip hér ;)

Þjóðráð dagsins

2004-09-19T02:05:00.000+02:00

Ef þið eruð með harðlífi skulið þið bara fá ykkur deBron low carb saltlakkrís. Svínvirkar alveg... gætuð örugglega farið í ristilspeglun strax á eftir.

Troy

2004-09-18T14:35:00.000+02:00

Var að horfa á þessa mynd í gær. Ekki ligg ég nú slefandi yfir Brad Pitt, fannst Hector bara miklu meiri töffari sko. Hann var líka svo góður ;) En já ágætis ræma, en ekki það stórvirki sem ég átti von á.

Sumt fólk sko

2004-09-16T22:46:00.000+02:00

Ætla að segja ykkur frá smá atviki í vinnunni. Það er einn gaur sem vinnur við að taka tölvusneiðmyndir (CT) af sjúklingunum sem þess þurfa. Það er sem sagt yfirleitt hann sem hringir upp á deild til okkar og lætur vita hvenær sjúklingurinn eigi að mæta niður til þeirra á CT-labbanum, hvort hann þurfi að vera með innsetta nál, hvort hann eigi að vera fastandi o.s.frv. Nema að þessi gaur getur bara verið svo ótrúlega dónalegur og leiðinlegur og það veit sko örugglega hver einasta hjúkka og sjúkraliði á deildinni minni hvernig þessi maður getur verið. Sem sagt alræmdur.

En allavegana þá hringir hann í dag út af einum sjúklingnum mínum og lætur vita um tíma sem hann á að vera mættur á, og að hann eigi að vera með græna nál í vinstri handlegg. Græn nál er sem sagt stærsta nálin sem við notum á deildinni, gróf og löng og ekkert auðvelt að setja hana upp hjá sumum. En þeir á CT vilja græna nál, þar sem þá er hægt að setja auðveldlega töluvert magn af vökva inni í æðina á skömmum tíma. Þetta er yfirleitt sett upp vegna skuggaefnis. Ég reyndar talaði ekki við gaurinn í símanum þá, en fékk bara þessi skilaboð.

Allt í lagi með það, nema að þegar ég fæ skilaboðin er ég einmitt að fara morgunsjúklingarúntinn með lækninum, auk þess sem sjúklingurinn var akkurat þá á leiðinni í aðra rannsókn. Þannig að ekki hafði ég tíma til að setja upp nál þá. Gott og vel. Sjúklingurinn kemur svo upp aftur eftir rannsóknina og þá var stutt í hina svo ég fer og næ í nálabakkann. Þá þurfti karlgreyið akkurat að fara á klósettið og ekki ætlaði ég að banna honum að míga. Jæja, síðan er hann loks búinn og ég fer að skoða æðarnar á honum... sem voru nú bara engar. Auk þess mátti ég ekkert stinga í vinstri handlegginn, þar sem hann var stokkbólginn. Maðurinn var þegar kominn með bleika nál, sem er minni en þessi græna, í hægri handarbakið, og ég ákvað að vera ekkert að hrófla við henni ef ég kæmi nú ekki upp þessari grænu. En allavegana, ekki æð að sjá, svo ég sting í olnbogabótina og hitti vel á æðina þar, nema að ég bara kom síðan ekki helvítis nálinni lengra inn, bara allt stopp. Þegar þarna var komið voru 10 mín þar til maðurinn átti að vera mættur, svo ég ákvað bara að hætta þessu veseni og láta þessa bleiku nál duga. Hringi bara á aðstoðarmanninn sem keyrir sjúklingana í rannsóknir og hringi svo niður á CT til að láta gaurinn vita að maðurinn komi niður með bleika nál, í HÆGRI handlegg, auk þess sem ég ætlaði að spyrja hann hvort ég þyrfti að senda með skýrsluna hans.

Díses kræst sko, fyrst varð gaurinn ógeðslega fúll yfir að sjúklingurinn væri ekki þegar á leiðinni niður (enda er hann þekktur fyrir að skammast og rífast ef sjúklarnir eru ekki komnir á mínútunni) og svo bara trompaðist hann um leið og ég sagði bleik nál. Hlustaði bara ekkert á það sem ég var að reyna að segja og tuðaði bara og röflaði um hvað þetta væri ógeðslega lélegt og lélegt, og þetta væri sko verulega lélegt og blablabla.... og SKELLTI SVO Á MIG áður en ég fékk sagt það sem ég ætlaði að segja. Ég bara vissi ekki hvaðan á mig stóð veðrið. Var þarna að reyna að komast að að segja frá bólgna handleggnum, byrjuð á setningunni, þegar mannfýlan gerir þetta.

Ég get svo svarið það, ég hef barasta aldrei orðið svona reið yfir nokkru í vinnunni. Ég gjörsamlega varð rauð af reiði, er sko ekki að ýkja því ég hreinlega roðnaði og var næstum farin að grenja bara af reiði. Hinar stelpurnar bara göptu þegar ég sagði að karlfjandinn hefði hreinlega skellt á mig án þess að ég fengið sagt það sem ég þurfti að segja.

Og já, ég varð svo reið, að ég stunsaði niður á CT-labbann, heimtaði að fá að tala við manninn sem ég hefði talað við í símanum, og sagði honum svo hreint út að þetta hefði mér nú fundist argasti dónaskapur og ég væri sko öskureið yfir þessari framkomu. Ég hefði einfaldlega ekki komið upp grænni nál og það væri bara algjör óþarfi að láta svona, og svo voga sér að skella svo bara á mann án þess að maður fengi sagt það sem maður þyrfti að segja. Hann varð nú alveg eins og smér og baðst afsökunar og afsakaði sig með því að hann hefði þurft að fara að sinna annarri rannsókn. Tók í hendina á mér og brosti sínu blíðasta og sagði svo að það var gott að ég kom niður og talaði við hann fyrst ég var ekki sátt. Hah! Hann vissi sko þokkalega upp á sig sökina þegar ég kom þarna strunsandi inn alveg öskuill. Hehehe, get svo sem ekki annað en hlegið að þessu núna. Stelpurnar á deildinni minni voru mjög ánægðar með að loks hefði einhver sagt honum til syndanna. Spurning hvort hann verður með svona dónaskap aftur næst þegar hann hringir.

Sko, ég get alveg vel skilið að það sé mikil pressa á starfsfólkið þarna niðri á CT og að þeir þurfi helst að halda strangri tímaáætlun til að geta tekið allar myndir sem þarf að taka. En þessi maður verður bara að skilja að það er líka mikil pressa á okkur á deildunum og við erum líka í tímapressu með að klára allt sem við þurfum að gera. Og svo er líka nóg að gera hjá aðstoðarliðinu sem fer með sjúklingana í og úr rannsóknir. Palli er nefnilega ekkert einn í heiminum á þessum sjúkrahúsum.

Jæja, þetta var púst dagsins. Verð nú að segja að mér leið mjög vel með sjálfa mig eftir að hafa sagt það sem mér í brjósti bjó við þennan CT kall. Hefur sko lengi langað til þess!!!

Jibbí skibbí, tjohei!!!

2004-09-15T23:52:00.000+02:00

Fékk fína launahækkun í dag :D Vonandi týnist þetta nú ekki allt í skattinum ;)

Og annað; draslið undir borðstofuborðinu mínu er horfið. Ég gæti sko boðið gestum hér inn núna með góðri samvisku :D

Mömmumont

2004-09-14T09:38:00.000+02:00

Hér eru nú sætustu börn í heimi :D

Undur og stórmerki

2004-09-13T23:44:00.000+02:00

Borðstofuborðið mitt er að koma í ljós undan draslinu :D

Gömlu góðu dagarnir

2004-09-12T22:42:00.000+02:00

Ooooh, ég þoli ekki raunveruleikaþætti. Er komin með algjört ógeð á þeim. Nú er nýbyrjað hér Norska Bachelorette og Norska Hommasveitin og bráðum byrjar Fitubolluhólminn, sem gengur út á að fylgjast með einhverjum yfirvigtareinstaklingum í átaki og hvort þeir falli nú ekki fyrir freistingunum sem lagðar eru fyrir þá. Svo er verið að sýna ameríska Dvergabachelorinn, Pabbabachelorinn, the Apprentice og ég veit ekki hvað og hvað og hvað... *gubb*. Mig alveg dauðlangar bara að fá almennilegar, gamlar og góðar, dramatískar og spennandi seríur á skjáinn. Svona eins og Roots, Thornbirds, All the rivers run o.s.frv. Mikið væri ég til í að kúra í sófanum í kvöld og horfa á einn af þessum þáttum og hlakka til að sjá næsta. Díses sko, ég held ég fari bara á stúfana og reyni að finna þessa þætti á DVD til að kaupa.

Drusludagur

2004-09-12T14:42:00.000+02:00

Jámm, það er hálfgerður drusludagur í dag. Hjalti lasinn, Arna með smá hita og Bjöggi líka, ég vaknaði með dúndrandi hausverk svo það er bara Elísa sem er fullfrísk. Arna og Bjöggi eru svo sem eiginlega alveg hitalaus núna og hausverkurinn minn er farinn, svo þetta er allt að koma. Heimilið er sem betur fer ekki allt í drasli :D

Og hamingjan heldur áfram

2004-09-11T22:34:00.000+02:00

Í kvöld náði ég að laga aðeins til inni á klósetti og í ganginum. Svei mér þá. Bjöggi gat líka vaskað upp í eldhúsinu og kláraði næstum allan uppvöskunarstaflann. Það var nefninlega svo lítið sem þurfti að gera í stofunni núna, híhí.

Elísa gistir aftur hjá Nikol, voða fjör hjá þeim, og litlu ungarnir eru að fara að sofa. Hjalti er reyndar smá lasinn, rauk upp í 40 stiga hita í dag, en er bara með í kringum 38 núna. En við hjónin ætlum að slappa af í rólegheitum og fínni stofu og horfa á the Shawshank Redemtion. Bjöggi hefur aldrei séð þessa mynd, ótrúlegt alveg. Það liggur við að ég öfundi hann að vera að fara að upplifa þessa mynd í fyrsta sinn ;D

20 mínútna kraftaverkið :D

2004-09-10T22:34:00.000+02:00

Þetta er nú bara besta ráð sem ég hef fengið til að halda heimilinu við. Gerðum þetta fyrst á miðvikudagskvöldið. Örnu fannst þetta nú ekkert sniðugt til að byrja með, en hresstist svo aðeins og svo fannst krökkunum þetta bara svaka fjör. Stofan varð svona þokkalega í standi eftir þessa törn, sást allavegana í stofugólfið ;) Á fimmtudagskvöldið var ég á kvöldvakt, en Bjöggi og krakkarnir endurtóku þessa 20 mínútna tiltekt og þegar ég kom heim var bara ekki allt í rúst eins og venjulega. Verulega ánægjulegt. Svo í kvöld var eitthvað svo lítið að laga til í stofunni að maður gat farið að ráðast á önnur svæði líka. Auk þess var Arna orðin svo svakalega til í tuskið og fannst bara æðislega gaman að taka til. Henni fannst hún vera alveg ofboðslega dugleg, enda var hún það og henni var hrósað í hástert. Þetta er sko mikil breyting á henni, stelpunni sem hefur alltaf fundist alveg agalega erfitt að laga smá til. Hjalti átti nú til að gleyma sér svolítið við tiltektina, hahaha, enda svoddan kjáni. Elísa er ekki heima í kvöld, gistir hjá Nikol vinkonu sinni, svo hún var löglega afsökuð.

Silla mín, þú ert hreinlega bjargvætturinn minn fyrir að koma með þetta snilldarráð. Held að þú hafir bara bjargað heimilinu mínu :D Knús, knús og 1000 kossar til þín :D

Sjálfsskoðun og syndajátningar

2004-09-08T13:44:00.000+02:00

Ég er búin að velta því svo lengi fyrir mér að ég er ekkert alveg sátt við sjálfa mig. Mér finnst ég ekki vera að nýta mig alla, ef svo má segja, finnst ég alls ekki nógu góð mamma og húsmóðir. Ég er allt of mikið bara eitthvað að slæpast og letingjast, í staðin fyrir að gera eitthvað uppbyggilegt. Þannig að nú er kominn tími á almennilega sjálfsskoðun, hverju vil ég breyta, hvaða takmarki vil ég ná og hvernig ætla ég að fara að því?

Í fyrsta lagi þá langar mig að vera virkari móðir. Þ.e. gera meira með krökkunum, lesa meira fyrir þau, spjalla meira við þau. Allt of oft þá eru þau nefninlega bara að dunda sér eitthvað, eða horfa á sjónvarpið, og ég hangi bara í tölvunni, eða hálfdotta í sófanum. Auðvitað er gott að þau geti dundað sér, en ég þyrfti að gera meira af því að taka bara þátt í leiknum með þeim. Líka að lesa meira fyrir þau og vera með þeim að teikna, lita og mála, leira o.s.frv. Það er margt hægt að gera sem maður gerir bara allt of sjaldan. Síðan þyrfti ég að eyða meira tíma í að bara spjalla við Elísu. Hún er á svo miklu flandri oftast, mikið úti að leika og svona. Það er auðvitað ágætt að hún er svona dugleg að leika sér og leiðist ekki. En ég held líka stundum að það sé ekki nógu mikil regla á henni. Ég held að ég ætti að setja niður smá tíma fyrir okkur tvær að tala saman, skikka hana bara fyrr inn á kvöldin stundum, eingöngu til að geta spjallað aðeins við hana. Hún hefur nefninlega gaman af að spjalla, bara við gefum okkur svo sjaldan tíma almennilegt spjall. Það er nefninlega týpískt að hún kemur inn seint og vill þá fara að spjalla og spjalla, en þá er náttúrulega kominn háttatími og enginn tími fyrir spjall. Og þá er ég ekki að meina eitthvað alvörugefið spjall, heldur bara spjall um heima og geima ;) Og svo annað, ég kannski sit upptekin í tölvunni þegar hún er til í að spjalla. Þarf hreinlega að forgangsraða betur. Mig langar ekkert að aðalminning barna minna um mig sé um mig upptekna í tölvunni eða hálfhrjótandi í sófanum.

Í öðru lagi langar mig að vera duglegari húsmóðir. Þetta heimili er yfirleitt allt í rúst og ekki gestahæft hér. Svo er nú líka stór ástæða fyrir að maður er ekki að dunda meira með krökkunum sú að það er bara ekkert pláss til þess. Þegar borðstofuborðið er fullt af drasli þá er lítið hægt að sitja við það og teikna og lita. Sama má segja um stofuborðið og eldhúsborðið. Þannig að það verður eiginlega að vera númer eitt að verð duglegari húsmóðir til að ég geti orðið virkari móðir. Silla vinkona benti mér á alveg brilliant ráð sem ég ætla að taka upp strax í dag. En það er að á hverju kvöldi þá eru teknar 20 mínútur í að taka til á fullu. Bara stilla skeiðklukku og svo hamast allir í 20 mínútur, hvorki meira né minna. Mér finnst þetta svo frábært. 20 mínútur er nefninlega svo stuttur tími og því auðvelt að vera á fullu allan þann tíma, og þar sem þetta er svona stuttur tími þá er auðvelt að fá alla í þetta. Hlakka til að sjá hvernig þetta reynist.

Í þriðja lagi þá er það megrunin mín, sem reyndar hefur nú verið í gangi í rúmlega 1 1/2 ár og ca 33 kg farin. Þannig að það gengur alveg ágætlega. Ég er samt í smá lægð núna og þarf að koma mér í gírinn aftur. Ég held reyndar að það komi eiginlega sjálfkrafa með hinu. Mér gengur alltaf best í átakinu mínu þegar það er góð rútína á heimilislífinu.

Til að ná þessum markmiðum þá er strax tvennt sem ég sé að ég þarf að laga sérstaklega. Annað þeirra er að fara að sofa á skikkanlegum tíma og sofa ekki fram eftir öllum degi þegar ég er í fríi. Bara nýta daginn og gera eitthvað á heimilinu. Hitt er að minnka tölvutímann, en tölvan er agalegur tímaþjófur og stundum hangir maður bara þarna af gömlum vana þó það sé svo sem ekkert sérstakt að gerast. Svo eru krakkagreyin að reyna að ná sambandi við mann og maður bara segir ha og já og hummar eitthvað því maður er svo upptekinn í tölvunni, glatað sko. En annars má nú nota þessa tölvu í svona kvolitítæm líka. Krakkarnir hafa nefninlega rosalega gaman af að sitja með mér og skoða t.d. skemmtilegar dýramyndir, eða bara myndir af öðrum krökkum. Eða þá Stubbasíðuna og Bubba byggi t.d. Svo tölvan er ekki alslæm ;) En, þarf samt að minnka tímann í henni.

Já, þar hafið þið það!

Töfrasproti óskast!

2004-09-07T23:25:00.000+02:00

Reyni hér enn og aftur að óska eftir töfrasprota sem hægt er að sveifla og láta allt verða hreint og fínt á svipstundu. Mig bráðvantar svona tæki. Nú eða ef einhver veit hvar ég get komist í samband við Mary Poppins til að ráða hana sem barnfóstru. Hrikalega getur þetta drasl á heimilinu farið í taugarnar á mér og það versta er að það hvefur ekkert, sama hversu lengi ég bíð. Ætli maður verði ekki bara að gera þetta á gamla mátann as usual *andvarp*

Sumir dagar sko :S

2004-09-05T18:30:00.000+02:00

Það er bara eins og það sé fyrirfram ákveðið að sumir dagar verði alveg horror. Byrjaði í morgun á því að hrökkva upp við brjálað rifrildi og öskur hjá Örnu og Hjalta þegar ég var að reyna að sofa eftir næturvaktina. Svo voru stelpurnar með svo mikil læti, gargandi og hlaupandi, fara út og inn með látum og hávaða að ég gafst hreinlega upp á að reyna að sofa og fór bara á fætur. Náttúrulega illa sofin, þreytt og pirruð. Svo bara er dagurinn búinn að vera svona, Elísa í fýlu, Arna vælandi, Hjalti argur og Bjöggi hálflasinn. Og ég sem á afmæli!!!! Svo þoli ég ekki að vera svona blönk að geta ekki einu sinni bakað eina köku eða gert neitt til að brjóta aðeins upp daginn og gera okkur smá dagamun. Skruppum á smá rúnt áðan á fína bílnum og það var reyndar mjög gott. En svo tók sami pirringurinn við þegar við komum heim, ótrúlegt. Nú er reyndar Elísa farin út með Örnu að leika smá og allir búnir að ákveða að hætta pirringi og fýlu. Ég er að hugsa um að grafa djúpt í skápunum mínum og gá hvort ég finni mögulega eitthvað sem ég get galdrað eitthvað gúmolaði úr... efast samt um það. Spurning um að eyða bara síðustu krónunum í smá sætindi og horfa svo á einhverja skemmtilega mynd með krökkunum... sjáum til.

Ég á afmæli í dag :D

2004-09-05T07:43:00.000+02:00

Ég á afmæli í dag
Ég á afmæli í dag
Ég á afmæli í daaaaaaag
Ég á afmæli í dag :D

Komin á nýjan bíl :D

2004-09-03T19:27:00.000+02:00

Jíha, við erum komin á nýjan bíl. Gamli skrjóðurinn okkar hefur nú dugað ágætlega og staðið sig vel. En það er bara svo margt sem þarf að gera við til að fá hann skoðunarhæfann, að okkur fannst ekki borga sig að vera að punga út fullt af peningum í þetta gamlan bíl. Þess vegna ákváðum við eftir nánari umhugsun að kaupa frekar almennilegan, nýlegan bíl í góðu standi. Þannig að nú erum við keyrandi um á Mitsubishi Lancer stationbíl, 96 módelið, og erum alsæl með hann. Rosalegur munur að vera á bíl sem er ekki með nein aukahljóð eða hristing ;) Hér er mynd af fína kagganum okkar ;)

Arna stóra

2004-09-02T18:37:00.000+02:00

Já, hún fór sko bara alein út í búð áðan með klink í poka og keypti ís handa sér og Hjalta. Svakalega dugleg. Reyndar er umrædd búð bara í ca 30 sekúnda göngufæri, en þetta er samt stór áfangi fyrir 4 1/2 árs skottu :D

Arna Valdís í augnskoðun

2004-08-30T21:24:00.000+02:00

Jæja, LOKSINS komst ég í augnskoðun með Örnu. Ég átti nefninlega tíma fyrir hana í byrjun JÚNÍ en var svo ótrúlega klár að ég gleymdi tímanum og þurfti að fá nýjan. Þá var náttúrulega læknirinn að fara í sumarfrí og langur biðlisti í þokkabót, svo við fengum ekki tíma fyrr en sem sagt í dag. Ég ætlaði sko ekki að missa af þessum tíma í þetta skiptið og stillti símann minn á að minna mig á þetta svona triljón sinnum ;) En jájá, við komumst sem sagt í skoðunina og Arna sá bara alveg ágætlega, sem betur fer. Læknirinn sagði að hún væri með örlítið skerta sjón, en það væri svo sem ekkert óalgengt og ekkert til að gera neitt veður út af. Bara fylgjast með henni hvort það versni nokkuð. Gott er nú að þetta var í lagi ;)

Brauðilmur mmmmm

2004-08-29T18:23:00.000+02:00

Já, ég er að baka brauð, svei mér þá. Annars var ég nú ósköp dugleg að baka brauð fyrir svona rúmu ári síðan, en svo fengum við okkur bíl og gátum skroppið til Sverige og keypt ódýrt brauð þar. En núna er buddan frekar tóm eftir sumarfríið, svo myndarlega húsmóðirin *hóst* tók sig til og bakaði brauð. Það eru sem sagt tvö girnileg brauð að bakast í ofninum ;) Og þar sem ég er nú á kolvetnasnauðu fæði og á ekkert að borða svona brauð, þá gerðist ég meira að segja svo dugleg að hræra saman kolvetnasnautt brauðmix og það er að hefast. Það verður sem sagt líklegast bara brauð og álegg í kvöldmatinn hér, en það er nú svakalega gott að fá svona nýbakað brauð :D

Meira um tvífarana

2004-08-28T20:44:00.000+02:00

Bara svona að gamni þá smelli ég hér inn myndum af þeim stöllum Natalie Wood og Birgittu Haukdal ;)

Annars á ég ekki orð yfir illgirninni og ósvífninni í ákveðnum aðilum á Barnalandi. Gjörsamlega samviskulausar.

Birgitta Wood eða Natalie Haukdal?

2004-08-27T00:26:00.000+02:00

Ég verð nú bara að deila þessu með ykkur. Þetta er sem sagt mynd af hinni gullfallegu og frægu leikkonu Natalie Wood heitinni. Mér finnst nú bara hún Birgitta Haukdal næstum nákvæmlega eins. Ótrúlega líkar :D

Hóhóhó, ég er á lífi

2004-08-25T19:37:00.000+02:00

Komin aftur til Noregs, sumarfríið bara búið, ég byrjuð að vinna, krakkarnir komnir í skólann og leikskólann og bara allt eins og áður. Æ það er samt gott að komast í rútínuna aftur ;)

Við fengum nú bara svaka fínt veður á Íslandi seinni hlutann þar, hitabylgja og fullt af hitametum slegið... ég sólbrann meira að segja :S Svo er bara rigning hér í Noregi í dag, piff :þ Samt frekar hlýtt sko ;)

En jæja, ég er þreytt. Ætla bara að horfa á Dinosaur með litlu ungunum mínum, gefa þeim smá jógúrt og koma þeim svo í bólið.

Í rigningu og roki

2004-08-04T13:05:00.000+02:00

En ekki hvað? Haha. Það var sko hífandi rok og grenjandi rigning sem tók á móti okkur þegar við lentum á Keflavíkurflugvelli s.l. föstudag. Sem sagt, ekta íslenskt veður ;Þ Manni yljaði bara um hjartaræturnar... en ekki annars staðar í líkamanum, hahaha. En það hafa nú komið sólarglætur líka ;) Við höfum það bara voða gott í íbúð sem vinkona mín lánaði okkur á meðan hún og hennar familia eru úti í sumarfríi. Mér svo sem hefði fundist sniðugara að hún hefði bara verið á Íslandi á meðan ég er hér... en svona er þetta :/

Jæja, er að hugsa um að skreppa í SUND á eftir, hef ekki farið í sund í meira en tvö ár. Það er svo ógeðslega dýrt í þessar sundlaugar úti, svona 1000 kall fyrir fullorðinn og kannski 800 kr fyrir börn, og svo eru engir heitir pottar. Svo nú ætla ég að nýta tækifærið og njóta þess að fara í almennilega sundlaug :D

Bjór er góður ;)

2004-07-28T21:53:00.000+02:00

Sit hér í góðu yfirlæti hjá Tídda og Daju í Horsens og drekk bjór, ekki er hann dýr hér allavegana, hahaha. Bið að heilsa í bili, hlakka til að koma til Íslands á föstudaginn :D

Ég fer í fríið...

2004-07-25T09:40:00.000+02:00

Erum að leggja af stað til Danmerkur, jíha :D Sjáumst síðar ;)

Bara tveir dagar í að við leggjum af stað :D

2004-07-23T21:21:00.000+02:00

Síðasti vinnudagurinn á morgun, JÍHA!!! Við erum alveg að vera búin að laga til í íbúðinni og ætli við notum ekki morgundaginn og annað kvöld til að pakka. Ji, þetta er bara alveg að bresta á :D Það er svo mikill spenningur í mér, hahaha, man ekki eftir að hafa verið svona spennt síðan ég var 9 ára og var að flytja til Svíþjóðar, híhí.

Jæja, ætla að brjóta saman smá þvott :D Það er engin þvottahrúga sem bíður mín, bara smá haugur sem ég var að taka af snúrunni og úr þurkaranum.

Mikið er ég ánægð :D

2004-07-22T17:35:00.000+02:00

Mér var boðið að sleppa við næturvaktirnar um helgina. Í staðin fyrir aðra þeirra þá færist ég yfir á dagvakt á laugardeginum, og hina fæ ég að geyma bara þar til seinna þegar þörf er á :D Ég er sko ferlega fegin. Þá hef ég miklu betri tíma til að undirbúa ferðalagið og þarf ekki að vera grútsyfjuð á sunnudeginum þegar við stefnum á að leggja af stað.

Morgundagurinn fer í að laga til hér heima (já, er ekki enn búin) og svo skipuleggja hvað þarf að taka með og vonandi pakka einhverju. Jiiii, hvað það er stutt í þetta. Mér finnst þetta líka bara svo gaman því ég hef eiginlega aldrei farið neitt sérstakt í sumarfríinu :D

Humm já!

2004-07-18T13:17:00.000+02:00

Ekki náði ég að taka allt til í nótt, gafst upp klukkan þrjú og fór bara að sofa. Það er alveg nóg eftir. En Elísa og Renate vinkona hennar eru farnar úr með Örnu og Hjalta svo ég þarf bara að setja í spíttgírinn og halda áfram. Ætla að klára að brjóta saman þvottinn fyrst, þetta er nú eilífðarverkefni, það bætist bara alltaf við. En svo ætla ég að taka herbergi barnanna í gegn, þá losnar sko hellings drasl úr stofunni, hehe. Jæja, best að drífa sig svo ég þurfi ekki að eyða öllum deginum í þetta. Langar að slappa af í kvöld.

Noregsbúar í tvö ár

2004-07-17T20:27:00.000+02:00

Ég var að fatta að það eru akkurat tvö ár síðan ég, Elísa og Hjalti fluttum til Noregs. Þá voru Bjöggi og Arna búin að vera hér í þrjár vikur. Veðrið var nú aðeins öðruvísi þennan dag fyrir tveimur árum, þá var sko yfir 30 stiga hiti og geggjuð sól og blíða. Eiginlega allt of heitt fyrir minn smekk, og þannig var það upp á næstum hvern einasta dag það sumarið. Í dag var ekki nema um 22 stiga hiti og að hluta til skýjað. Sumarið í ár hefur alls ekki verið neitt sérstakt, held þetta sé hreinlega lélegasta sumarið hér í 20-30 ár. En ég ætla svo sem ekkert að kvarta, höfum alveg haft rosa fína daga líka ;) Það verður þá bara betra sumar næst. Svo erum við hvort sem er að fara til Íslands, vona bara að veðrið verði ágætt þar. Annars væri það alveg týpískt að á meðan við værum á Íslandi væri sólarlandaveður hér, hehehe. Það er reyndar spáð góðu veðri næstu daga. Ein vika í sumarfrí, jíha!!!

Skúra, skrúbba og bóna...

2004-07-17T17:50:00.000+02:00

Ja, er reyndar ekki komin svo langt. Er bara enn að brjóta saman þvottafjallið mitt. Það er ekkert smá sem það tekur langan tíma. En ég ætla sko að vera búin að taka til fyrir morgundaginn og geta slappað af í hreinni íbúð á morgun. Þá skal ég frekar vera í alla nótt að taka til. Þetta mjakast nú. Kallinn er búinn að vera duglegur að taka eldhúsið í gegn, það var nú ágætis uppvasksstafli sem beið þar. Elísa og Renate vinkona hennar eru búnar að vera voða duglegar að fara út með Örnu og Hjalta, þvílíkur munur. Það er nú afskaplega lítið hægt að gera með Hjalta hangandi yfir sér ;) En nú ætla ég reyndar að elda smá mat áður en haldið verður áfram :D

Styttist í sumarfrí :D

2004-07-16T19:01:00.000+02:00

Það er eins gott að fara að koma íbúðinni í stand og fara að skipuleggja hvað við þurfum að taka með okkur. Ég nenni sko ekki að koma heim úr sumarfríinu í eitthvað helvítis drasl hér. Svo bara verð ég að nota þessa frídaga núna um helgina og mánudaginn til að pakka, því ég vinn síðan alla daga fram að sumarfríi eftir það. Ji, hvað það er stutt í þetta :D Oh hvað það verður gaman. Svo er sumarið komið loksins, týpískt, þegar við erum að fara til Íslands, hahaha. En við verðum nú í Danmörku fyrst og það spáir líka góðu veðri þar.

Jæja, er að affrysta ísskápinn, best að fara að þrífa hann ;)

Nóg um að vera og gera

2004-07-13T16:52:00.000+02:00

Jæja, ég mætti í vinnu klukkan hálfþrjú í gær, var á kvöldvakt. Svo um klukkan hálfsex hringdi ein sem átti að koma á næturvakt og sagðist ekki komast þar sem hún væri veik. Og þar sem ég var með ábyrgðina á deildinni í gær var það ég sem þurfti að redda aukamanneskju á næturvakt. Þið getið náttúrulega ímyndað ykkur hvað flestir eru til í að koma á næturvakt þegar maður hringir á þá svona 3-4 tímum áður en vaktin á að byrja. Svo er bara sumarfrístími, helmingurinn af starfsfólkinu í sumarfríi og hinir sem eru ekki í sumarfríi en samt ekki að vinna voru flestir eitthvað skroppnir út úr bænum, í smá bátasiglingur, höfðu ekki pössun o.s.frv. Þannig að það var bara nákvæmlega enginn sem vildi eða gat komið á næturvakt. Það endaði því með að ég varð bara a taka þessa næturvakt sjálf. Jú, ég hefði svo sem getað skipað einhverjum að taka næturvaktina, ég hef það vald þegar ég hef ábyrgðina á deildinni. Ég verð að vera með lágmarksmönnun hreinlega til að deildin sé örugg. En mig langaði bara ekkert til að skipa einhverjum að koma á vakt, sérstaklega þar sem þær einu sem höfðu möguleika til að koma (ekki farin út úr bænum eða með barnapíuvandamál) voru búnar að vinna mikið undanfarna daga, taka aukavaktir og svona. Svo ég vann bara sjálf áfram. Þetta var sem sagt rúmlega 16 tíma törn, ég stakk af 3 kortérum fyrr til geta keyrt kallinn á réttum tíma í vinnuna, annars hefði þetta verið nálægt 17 tíma törn.

Já og bíllinn, OMG sko. Ég held að það hljóti að vera kústskaft rekið upp í rassgatið á þessu liði sem starfar þarna, ótrúleg stífni. Bjöggi fór sem sagt á skrifstofuna að leysa þetta mál. Þá kemur í ljós að það var klippt af bílnum út af DRÁTTARVÖXTUM sem höfðu lagst á umskráningargjaldið þar sem við greiddum það ekki alveg á réttum tíma í fyrra. Við höfum ALDREI fengið neinar upplýsingar um þessa dráttarvexti og enga rukkun fyrir þeim. Og þessir svakalegu dráttarvextir voru alveg heilar 24 Nkr. eða svona um 250 ísl. krónur. Ég meina það. Svo gat hann ekki borgað þetta á staðnum heldur þurfti að fara í banka með gíróseðil upp á 24 krónur til að fá stimpil á þetta. Hér er rándýrt að borga gíróseðla í banka, þeir taka 40 krónur (ca 400 ísl.) í þjónustugjald. Þannig að blessaður gíróseðillinn var mun dýrari en sjálf skuldin. Og ekki nóg með þetta vesen heldur vorum við rukkuð um fokking 2400 Nkr. í SEKT. Þetta er um 25 þúsuns íslenskar. Ég á bara ekki orð yfir fávitaskap og stífleika. Þar að auki er þetta jafnvel ekki einu sinni löglegt því það eru einhverjar reglur hér um að það sé skylda að láta vita af skuld og gefa fólki kost á að greiða hana áður en gripið er til aðgerða. Við erum búin að leggja inn kvörtun yfir þessu og ég þarf svo eiginlega bara að kynna mér betur lögin í kringum þetta. En að hreinlega gera þetta. Og afhverju ekki bara rukka þá þessa blessuðu dráttarvexti með t.d. bifreiðagjöldunum? Ferköntuðu Norðmenn sko *GARG*

En jæja, bíllinn er allavegana kominn á númer aftur og Bjöggi fór í vinnuna í morgun :D

Ég er BRJÁLUÐ!!!

2004-07-10T16:31:00.000+02:00

Það komu hér menn frá Tollinum áðan og hreinlega bara klipptu af bílnum. Þeir halda því fram að umskráningargjöldin hafi ekki verið greidd, en við greiddum þau í fokking SEPTEMBER Í FYRRA, rétt eftir að við keyptum bílinn. Greiddum í netbanka svo við erum ekki með kvittun liggjandi á lausu til að sýna þessum fíflum.

Bjöggi var að reyna að ræða við þessa helvítis kalla. Segir þeim að þetta hafi verið greitt og spyr hvort þeir geti ekki komið þá bara aftur eftir helgi þegar búið sé að tékka á þessu betur. Nei, það var sko ekki hægt, það væri ekki búið að greiða þessi gjöld síðan í APRÍL í fyrra. Og Bjöggi sagði þeim nú pent að hann hefði ekki keypt bílinn fyrr en í SEPTEMBER. "Já, eða september eða eitthvað" var þá svarið. Svo segir þessi tollkall að þar sem umskráningargjaldið hafi ekki verið greitt þá sé bíllinn enn á nafni fyrri eiganda. Og Bjöggi spyr þá hvernig í ósköpunum standi þá á því að hann sé búinn að fá rukkun fyrir bifreiðagjöld á SÍNU EIGIN nafni og sýndi þeim það. Nei, það eru bara MISTÖK, var svarið. Segir svo að þar sem ekki hafi verið greidd þessu umskráning þá séum við ekki búin að fá senda miða fyrir greiðslu á bifreiðagjöldunum (en það er svona miði sem maður fær til að líma á bílinn). Bjöggi segir þá að hann hafi nú einmitt verið að lesa um þetta og þar hafi verið tekið fram að síðasta hollið af þessum miðum sé ekki sent út fyrr en 2. ágúst, en tollfíflið sagði nú bara ekkert þá.

Svo spyr maðurinn minn hvort að þeir ætli þá að borga kostnað af óþægindum sem við verðum fyrir vegna þessa, svo sem leigubílakostnað og svona. "Nei, þú getur bara hjólað" var svarið. Þvílíkur dónaskapur og óliðlegheit. Og að gera þetta á LAUGARDEGi þegar ALLAR opinberar skrifstofur eru lokaðar og EKKI SÉNS að leysa þetta mál núna. Ég er að fara að vinna á næturvakt á eftir, krakkarnir boðnir í afmæli á morgun, börnin þurfa að komast á leikskóla á mánudagsmorguninn og kallinn þarf að mæta eldsnemma í vinnu... og ekki getum við notað bílinn. Ekki eru nú strætósamgöngurnar hér til að hrópa húrra fyrir. Ég kæmist t.d. aldrei með börnin í leikskóla og á réttum tíma í vinnuna með strætó ef ég væri á morgunvakt.

OOOOOOH, ég er bara svo ógeðslega reið og pirruð og brjáluð, og mest yfir að geta ekki einu sinni hringt í tollvesenið og rifið kjaft yfir þessu. Helvítis aumingjar bara!!!

Það styttist óðum :D

2004-07-08T09:27:00.000+02:00

Bara 17 dagar í sumarfrí :D Jibbí skibbí! Þá verður brunað af stað til Danmerkur, tökum væntanlega allan daginn í að keyra... eða elsku kallinn minn fær víst að keyra þar sem ég er á næturvakt nóttina áður. Reikna með að sofa aðeins á leiðinni ;) Svo er ég nú búin að heimta að við stoppum aðeins í Lundi í Svíþjóð á leiðinni svo ég geti sýnt þeim æskuslóðIrnar. OMG ég fæ nú bara fiðring í magann að hugsa um að koma þangað aftur. Flutti frá Lundi til Íslands þegar ég var á 16. aldursári og fór svo reyndar út í heimsókn tveimur árum seinna. En síðan hef ég ekki komið þangað og það eru sem sagt 16 ár síðan ég var þarna síðast. VÁ!!! Nú fæ ég bráðum nostalgíukast :D

En já, svo liggur leiðin til Slagelse, sem er svona klukkutíma akstur frá Kaupmannahöfn, en þar býr frændfólk hans Bjögga. Þar fáum við gistingu um nóttina. Daginn eftir var svo planið að slæpast aðeins um í Köben, fara kannski í Tívolí eða Dýragarðinn, labba á Strikinu og versla kannski smá ;) Gistum síðan aftur hjá Slagelefjölskyldunni næstu nótt og leggjum svo snemma næsta dag af stað til Horsens að heimsækja Tídda og Daju :D Þá verður nú fenginn sér bjór á kvöldin, en við gistum hjá þeim tvær nætur. Ætlunin er að fara í Lególand með krakkana og svo bara hafa það gott og njóta tímans með góðum vinum. 29. júlí eiga kallinn minn og dóttir Tídda og Daju afmæli, svo ég reikna með smá afmælisveislu þá.

Síðan verðum við víst að leggja af stað aftur til Slagelse um kvöldið sama dag, þar sem við þurfum að vera mætt á Kastrup flugvöll snemma næsta morgun. Þá verður flogið með Flugleiðum beina leið til Íslands. Þá er verslunarmannahelgin að ganga í garð á Fróninu, en það verður nú ekkert fyllerí og djamm á okkur, heldur liggur leiðin upp í sveit með mömmu og pabba. Ætlum að njóta helgarinnar á Högnastöðum... en ég heimta nú að pabbi gefi mér bjór samt ;)

VÍÍÍÍÍÍÍÍÍ HVAÐ ÉG HLAKKA TIIIIIL!!!!!!!!!

Blóðgjöf bjargar mannslífum

2004-07-07T10:04:00.000+02:00

Var að lesa umræðu um blóðgjöf á Barnalandi. Vil bara nota tækifærið og hvetja alla til að drífa sig niður í Blóðbanka og gefa blóð. Það er alltaf skortur á blóði og Blóðbankinn er nánast aldrei með lágmarksbirgir af öllum blóðflokkum. Fólk gerir sér heldur oft ekki grein fyrir að blóð er ekki bara notað þegar slys verða heldur er þetta mjög mikið notað í allskonar aðgerðum þar sem fólk tapar blóði. Ein stór aðgerð getur t.d. auðveldlega tæmt upp birgðirnar í einum blóðflokki á skömmum tíma. Eins hafa sumir sjúkdóma sem krefjast þess að þeir fái blóðgjöf reglulega til að hreinlega virka í lífinu. Má þar t.d. nefna suma krabbameinssjúklinga og nýrnasjúklinga. Eftir erfiðar fæðingar og keisara getur þurft að gefa töluvert blóð o.s.frv.

Ef þú ert frískur einstaklingur, ekki á lyfjum, ekki undir kjörþyngd, ekki ólétt og ekki nýbúin að eignast barn (verður að líða ár frá barnsburði) þá skaltu endilega drífa þig niður í blóðbanka og kanna hvort þú megir gefa. Í fyrsta skiptið sem þú kemur er eingöngu tekið smá blóðsýni til að athuga með blóðrauðann, en gildi hans má ekki vera of lágt, járnbirgðir sem mega heldur ekki vera of lágar, og blóðið er síðan skimað fyrir lifrarbólgu B og C ásamt HIV veirunni. Að sjálfsögðu er blóðið síðan mótefnaskimað og blóðflokkað. Þú fyllir svo út heilsufarsskýrslu, sem er náttúrulega trúnaðarmál og ef þú uppfyllir öll skilyrði um blóðgjafa máttu koma aftur eftir tvær vikur og gefa blóð.

Blóðbankinn er opinn mánudaga og fimmtudaga 8:00-19:00, þriðjudaga og miðvikudaga 8:00-15:00 og föstudaga 8:00-12:00. Svo er blóðbankabíll sem keyrir um landið og safnar blóði á landsbyggðinni. Hann er í sumarfríi í júlí og ágúst, en fer aftur af stað í september.

Svo getið þið lesið ykkur meira til um Blóðbankann og starfsemi hans hér: Blóðbankinn.

Góðan daginn

2004-07-07T09:10:00.000+02:00

Ég er svoddan snillingur. Ætlaði að svara einu kommentinu og eyddi því bara út í staðin. Mjög klár, dah! En H.L.Devil, þú misskildir mig alveg með þetta komment á síðunni þinni ;) Er reyndar búin að svara þér þar.

Jæja, ætli mér takist að taka til í dag? Ég þyrfti sko að taka mér taki og taka almennilega til. Takitakitak, Dóra Takefúsa, er hún fús til að taka til? Mig vantar þernu fyrst ég fæ engan töfrasprota... eða bara þræl, það er ódýrara. Ég bara skil ekki hvað varð af tuskugenunum í mínu tilfelli, bæði mamma og pabbi hafa þau. Þetta er greinilega ríkjandi gen og ég bara verið svo innilega óheppin að fá það EKKI í arf frá foreldrum mínum. Ekki hefur maðurinn minn þetta gen heldur svo það er augljóst að aumingja börnin okkar erfa það ekki.

Jæja, ég ætla að leggja mig til hádegis og fara svo að taka til. Bara VERÐ að gera eitthvað hérna.

Geeeeiiiiiiiiiisp!

2004-07-06T10:14:00.000+02:00

Þetta er gallinn við að vera á næturvöktum, maður er svo lengi að snúa sólarhringnum almennilega við aftur. Sofnaði ekki fyrr en klukkan hálfsex í morgun og druslaðist svo á fætur hálfátta og dreif krakkana í leikskólann. Svo núna er ég hálfupptjúnnuð en samt syfjuð, veit ekki alveg hvað ég á að gera af mér. Sit bara og sörfa á netinu, skoða bloggið hjá barnalandsstelpunum og er eiginlega grútsyfjuð. Svo veit ég að ég legg mig á eftir, sef líklega til fjögur og sæki þá krakkana og geri ekkert meira í dag. Eins og það þyrfti nú að taka til hér. Hvernig var þetta með töfrasprotann? Er virkilega enginn sem veit hvar maður fær svona tól?

En þar sem ég er svo upptekin við að gera ekki neitt þá dundaði ég mér við að merkja við hvaða lönd ég hef heimsótt. Evrópukort dugar mér vel. Ég meira að segja merkti við Skotland sko til að láta þetta líta betur út, ég nebbla sko millilenti þar einu sinni á leiðinni til Íslands. Fór að vísu aldrei út úr vélinni, en hey, ég var þar SAMT!!! Hér er þetta fína kort:

create your personalized map of europe
or write about it on the open travel guide

Lítil stúlka komin í heiminn

2004-07-04T21:07:00.000+02:00

Hún Sísí sæta í Sarpsborg eignaðist litla stúlku í nótt, og það var svo sannarlega lítil stúlka því hún kom sex vikum fyrir tímann. Var um 8 merkur og 40 cm ;) Sísí er búin að vera inni á spítala undanfarna daga vegna meðgöngueitrunar, svo það var nú alveg viðbúið að barnið kæmi eitthvað fyrir tímann. En þetta gekk víst allt vel og bæði móður og barni heilsast prýðilega. Til hamingju Sísí og fjölskylda :D

Hugmyndasnauð og löt

2004-07-04T19:35:00.000+02:00

Ég er nú meiri mamman. Ég er bara svo hugmyndasnauð og löt í dag að mér dettur ekkert í hug að gera nema hanga á netinu, og nenni engu hvort sem er. Krakkagreyjunum er bara plantað fyrir framan imbann, rétt nennti að elda handa þeim mat. Svo er ég að fara á næturvakt á eftir, síðasta næturvaktin í þessari lotu. Ef einhver er með hugmyndir um hvað ég get gert á morgun með þessum aumingjas krökkum sem voru svona óheppin að eignast mig sem mömmu, vinsamlegast látið mig vita. Ef sá hinn sami, eða einhver annar, veit hvar hægt er að fá töfrasprota sem hægt er að sveifla og galdra að allt verði hreint og fínt á heimilinu, þá endilega látið mig vita líka. Er alveg tilbúin að borga dágóða upphæð fyrir slíka græju.

Næturvaktir

2004-07-03T15:04:00.000+02:00

Er það ekki alveg dæmigert. Næturvaktahelgi hjá mér og þá er þetta frábæra veður, einmitt þegar ég þarf að eyða öllum deginum í að sofa. Svona var þetta líka síðast þegar ég var á næturvöktum. Síðan átti ég tvær helgar frí og þá var rigning og skýjað. Nú er aftur næturvaktahelgi hjá mér og þá skín sólin og hitinn fer upp í 20-25 gráður eða svo. Svo var verið að biðja mig um að taka tvær aukanæturvaktir næstu helgi, ætli ég geri það ekki og fæ 100% álag ofan á þær ;) Ágætt að vinna sér inn smá aukapening áður en maður fer í sumarfrí.

Sveitasæla

2004-07-01T21:25:00.000+02:00

Ég er svona aðeins að reyna að plana Íslandsheimsóknina. Ég er að vonast til að mjónurnar mínar geti smalað sér saman í eina sveitahelgi með mér. Ég er búin að panta Högnastaði helgina 13.-15. ágúst og vona bara að þær geti komið sem flestar. Þetta er svo frábær staður fyrir bæði krakka og fullorðna. Högnastaðir er gamall sveitabær þar sem ég átti heima þegar ég var lítil. Mamma og pabbi eiga húsið enn og núna er þetta griðastaðurinn okkar :D Yndislegt að fara þarna. Við munum fara svo til beint þangað þegar við komum til Íslands og vera þar um verslunarmannahelgina ásamt mömmu og pabba. Svo vona ég sem sagt að stelpurnar geti komið með fjölskyldum sínum þriðju helgina í ágúst.

Sorglegt

2004-07-01T10:35:00.000+02:00

Hann Kristófer litli, sem svo margir á Barnalandi og víðar hafa fylgst með, er dáinn. Hann lést í gær, rétt fyrir klukkan átta að kvöldi til, í örmum móður sinnar. Fyrir þá sem ekki vita þá fæddist Kristófer löngu fyrir tímann og þurfti allt sitt stutta líf að berjast við alvarlegan lungnasjúkdóm vegna óþroskaðra lungna sinna. Þessi litla hetja þraukaði í mera en 4 mánuði held ég, en varð að lokum að láta undan. En nú er hann loks frjáls og laus undan erfiðinu og þjáningunum. Ég hugsa til foreldra hans núna, sem hljóta að eiga afskaplega erfitt. Vonandi finna þau leið til að takast á við sorgina og vinna úr henni. Mikið afskaplega er ég þakklát fyrir að eiga þrjú heilbrigð börn. Ég held að þetta hljóti að vera það versta sem foreldrar geti upplifað, að missa barnið sitt. Þegar ég frétti af þessu með Kristófer í gær kom það mér í raun ekkert á óvart, ég er meira hissa á hvað hann barðist lengi þessi litla hetja. En þó ég þekkti hann ekki neitt, né foreldra hans, þá runnu bara tárin. Samt var mér að sumu leyti létt að litli drengurinn hefði fengið friðinn, þetta virtist allt vera orðið svo ofboðslega erfitt hjá honum. Ég held að stundum sé jafnvel erfiðara að horfa á barnið sitt berjast og þjást svona rosalega, heldur en að leyfa því að fara og fá hvíldina. Ég vona bara að ég þurfi aldrei að upplifa þetta sjálf.

Ég sendi foreldrum Kristófers og öðrum ástvinum mínar innilegustu samúðarkveðjur.

Útbrot

2004-06-26T00:23:00.000+02:00

Jahérna hér. Í morgun vaknaði ég með fáránlega dofna efri vör, og smá dofin í neðri, svona eins og þegar deyfing er að fara úr. Svo var ég með upphleypt útbrot á bakinu, öðrum úlnliðnum og framan á ökklunum. Og svo klæjar mig þvílíkt í þetta. Svo hafa útbrotin bara smám saman aukist í dag, er komin með þetta upp að hnjám og í báðar olnbogabæturnar, svo til allt bakið og á axlirnar, á bringunni og á hálsinn. Ein hjúkkuvinkonan mín (íslensk) sem vinnur á bráðamótökunni á Lansanum ráðlagði mér að fara til læknis því ég þyrfti líklega eitthvað við þessu. Ég hringdi svo á læknavaktina og þau vildu bara fá mig niðureftir sem fyrst að skoða þetta.

Ég dreif mig því niðureftir, fékk strax eina ofnæmistöflu og beið svo og beið eftir að fá að hitta lækni. Þegar meira en klukkutími var liðinn leyfði hjúkkan mér að fara heim, því taflan var greinilega farin að virka, útbrotin að dofna og ég ekkert að versna. Er enn svolítið dofin í vörunum, en samt skárri. Fékk bara aðra töflu með mér heim til að taka á morgun. Svo hef ég auðvitað samband ef ég fer eitthvað að versna aftur. Losnaði allavegana við að borga, hehe.

Ég er búin að spá og spekulera hvort það sé eitthvað sem gæti hafa valdið þessu, en ég finn ekkert. Ekkert nýtt sem ég hef prófað, hvorki matur, föt né lyf. En ég hef engin einkenni frá öndunarfærunum svo ekki virðist þetta vera neitt ofnæmislost allavegana ;) Ég hef sko aldrei verið með neitt ofnæmi, en hún Anna María ofurhjúkkan mín segir að þetta geti komið án nokkurrar skýringar stundum.

Loksins smá almennilegt frí :D

2004-06-24T16:01:00.000+02:00

Er sko komin í þriggja daga helgarfrí og þarf þokkalega á því að halda. Það var brjálað að gera í vinnunni í gær og brjálað í dag. Ég var eini hjúkrunarfræðingurinn í minni grúppu, því hin var veik og ekki tókst að fá neinn í afleysingar. Venjulega erum við tveir hjúkrunarfræðingar á dagvakt með svona 8-10 sjúklinga, sem sagt 4-8 á mann. En í dag var ég ein með 10 sjúklinga og það var bara þvílíkt mikið að gera með þá alla. Held að ég hafi bara aldrei upplifað svona dag áður í vinnunni. En ég er náttúrulega svo klár að ég náði að ganga frá öllu því mikilvægasta áður en kvöldvaktin tók við :Þ

Hér er grenjandi rigning, hjólaði í og úr vinnunni og ég er svoleiðis rennandi blaut. En nú er ég komin heim og get slappað af, jíha :D

Þreytt!

2004-06-22T20:56:00.000+02:00

Amm, ég er freeeekar þreytt. Ég er búin að vera að vinna svo mikið. Þó svo ég hafi verið í fríi um helgina er ég bara næstum búin að vera að vinna stanslaust vikurnar tvær á undan, og svo er ég að vinna fjóra daga í röð í þessari viku. Hlakka ekkert smá til að fá frí á föstudaginn og um helgina. Þá get ég líka loks tekið íbúðina í gegn. Ég bara hef svo litla orku í að gera eitthvað þegar ég hef verið að vinna og svo með krakkana hangandi í mér. Æ þau eru svo miklar dúllur. Annars er hún Elísa eiginlega flutt að heiman. Hún vældi það út hjá Bjögga að fá að gista hjá Renate aftur í nótt, gisti þar sko síðustu nótt. Renate er nefninlega að fara eitthvað burt í sumarfrí á morgun og þess vegna bara URÐU þær að fá að vera saman þessa síðustu tvo daga. Æ, það er samt svo gaman hjá henni og hún skemmtir sér konunglega :D Og ef ég á að vera alveg hreinskilin þá er líka ágætt að hafa einungis tvö börn í stað þriggja í smá stund, sérstaklega þegar ég er svona mikið að vinna. Vona að það verði svo gott veður um helgina og að við getum gert eitthvað skemmtilegt. Elísa er komin í sumarfrí núna, það var síðasti skóladagurinn í dag.

Jæja, ég ætla aðeins að skoða netið, aðallega Barnaland, enda er ég algjör fíkill. Ég er á kvöldvakt á morgun, er ferlega fegin að þurfa ekki að vakna eldsnemma enn einn daginn. Ég er engin A-manneskja, hehe. Virka miklu betur á kvöldin.

Óhræsis mígreni

2004-06-20T18:58:00.000+02:00

Sem betur fer hrjáir það ekki mig, en elsku kallinn minn liggur alveg ónýtur inni í rúmi að drepast úr verkjum og vanlíðan :( Fékk sér einn kóksopa og kastaði upp maganum í staðin. Ég opnaði hurðina þarna inn og hann bað mig vinsamlegast að loka henni því hann þyldi ekki matarlyktina. Ég var bara ekkert að elda, það var fólkið á neðri hæðinni. Svo voru allar verkjatöflur búnar, en stundum er nú gott að vera hjúkka. Ég brunaði niður á deild og fékk fyrir hann verkjastíla og ógleðistillandi, vonandi hjálpar það smá svo hann geti sofið aðeins. Svefninn virkar oftast best á þetta. Aumingja kallinn :( Ég komst ekkert í leikfimi í dag því ekki gat ég skilið börnin eftir hjá pabba sínum. Kannski ég komist út að labba í kvöld þegar þau eru sofnuð.

Elísa er loks komin heim. Hún bað nú um að fá að gista eina nótt enn, en þá sagði ég nei. Fannst að hún gæti nú aðeins verið heima hjá sér ;)

Unglingamamma?

2004-06-19T21:24:00.000+02:00

Ég held bara að hún elsta dóttir mín sé flutt að heiman. Hún hefur gist eina nótt heima hjá sér þessa vikuna. Á mánudaginn gisti hún hjá Renate, á þriðjudaginn líka (ég var á kvöldvakt), á miðvikudaginn gisti hún heima hjá sér, á fimmtudaginn hjá Karine (ég var líka á kvöldvakt þá) og í gær hjá Renate aftur. Svo hringdi Elísa í dag og það var svo svakalega gaman þannig að þær suðuðu og suðuðu um að Elísa fengi að gista aðra nótt. Ég bara fann enga ástæðu til að banna henni það svo hún fékk bara að gista aftur. Sumarið að koma og skemmtilegt að vera til. Renate er líka bara aðra hvora viku þarna hjá pabba sínum, hina vikuna býr hún hjá mömmu sinni sem býr lengra í burtu. Allavegana virðist pabba hennar Renate finnast þetta í góðu lagi, hugsa líka bara að þær séu ósköp góðar og sjálfum sér nægar þegar þær eru svona tvær saman. Renate virkar voða góð og indæl stelpa ;)

Annars er ég að rembast við að reyna að taka til. Er svona hálfnuð með eldhúsið, þvílíkt drasl. Uppvask í stórum stöflum. Annars bakaði ég mér voða gott kolvetnissnautt brauð, keypti bara tilbúið brauðmix sem maður blandar bara vatni, olíu og geri út í. Fínt að eiga eitthvað brauð sem maður getur leyft sér stundum :D

Kallinn er að horfa á fótboltann, en ekki hvað sko ;) Ég hef svona takmarkaðan áhuga á honum, finnst reyndar fínt að sofna yfir þessu :þ

Þrumur og eldingar

2004-06-18T16:13:00.000+02:00

Vá, það var ekkert smá þruma sem ég var að heyra í. Það er búið að vera svo hlýtt og gott í dag, en svo kom bara brálæðisleg hellidemba rétt áðan og núna er greinilega þokkalegt þrumuveður. Gaman, gaman :D Annars er svo mikið drasl hér og ég nýkomin heim úr vinnu, þannig að ég ætla bara að draga fjölskylduna á Makkann og borða þar. Nenni ekki að reyna að elda með allt í rúst í eldhúsinu. Verð svo að taka til á eftir... eða á morgun :Þ

Iceland, here we come :D

2004-06-17T23:46:00.000+02:00

Við erum búin að versla miða :D Fljúgum frá Kastrup flugvelli í DK þann 30. júlí og eigum að lenda klukkan 11:55 að íslenskum tíma. JIBBÍ!!! Förum svo aftur til Noregs þann 21. ágúst ;) Við ætlum að vera í Danmörku í ca viku áður en við förum til Íslands og heimsækja Tídda og Daju í Horsens. Skreppa í Legoland og svona. Verður örugglega svaka fjör. Vá hvað ég er farin að hlakka til :D

Prakkarar

2004-06-16T21:31:00.000+02:00

Arna og Hjalti eru komin upp í rúm, Bjöggi er í heimsókn hjá kunningja sínum og ég og Elísa erum að hugsa um að prakkarast og horfa á Harry Potter, þó svo klukkan sé orðin frekar margt og skóli hjá henni á morgun. Æ, maður má prakkarast stundum ;D

Frumskógur dömubinda og túrtappa

2004-06-15T23:29:00.000+02:00

Það er nú ekkert smá úrval í þessum geira, stundum veit maður bara ekkert hvað maður á að velja. Extra þunn bindi, þykk, ofurrakadræg, með fráhrindandi húð, löng, G-strengs-löguð, mini, næturbindi, með vængjum, án vængja, með þyrluspöðum (neeee, kannski ekki), túrtappar í allskonar stærðum, OB, einhver önnur tegund, með uppsetningargræju.... gwaaaaaaa!!!!!

Þegar ég var yngri lét ég sannfærast af auglýsingunum og var viss um að þessi þynnstu bindi og dýrustu, með vængjum og fráhrindandi húð væru best. En þessi blessaða plasthúð fór svo bara að pirra mig. Mér fannst alltaf eins og bindið væri rakt, það sætu blóðlifrar ofan á því (sorry ef þetta fer fyrir brjóstið á einhverjum) og ég fékk bara ekkert þessa frelsistilfinningu sem allar dömubindagellurnar í auglýsingunum hafa. Nei, ég uppgötvaði bara að þessi miðlungsþykku, með engri plastógeðshúð eru langbest. Vil reyndar hafa vængina sko ;)

Svo eru það túrtapparnir, kaupi alltaf bara einhverja NORMAL gerð og nota þá svona stundum, spari ;) T.d. ef ég er að fara eitthvað út og ef ég skyldi slysast í sund.

Þetta voru dömubinda- og túrtappapælingar kvöldsins. Eins og einhverjum hefur kannski dottið í hug þá er hún Rósa frænka í heimsókn akkurat núna. Eða bara einfaldlega: ég er á blæðingum.

Sæla

2004-06-14T18:27:00.000+02:00

Við vorum að fá senda DVD diska með barnamyndum með íslensku tali frá Íslandi (takk Anna María) og hér sitja tvö hamingjusöm börn og horfa spennt á Leitina að Nemo. Alveg frábært að fá þessa diska ;)

Annars var ég nú að hugsa að ég þarf að fara að komast að því hvenær skólinn er búinn hjá Elísu, ég bara veit ekki neitt. Svo þurfum við helst að kaupa farmiðana til Íslands á morgun og ætli ég þurfi ekki að kría út smá frí fyrir Elísu í ágúst. Reikna með að skólinn verði byrjaður áður en við komum til baka. Jæja, það kemur í ljós.

Frábært veður í dag. Það leit nú ekki vel út í morgun, rok og skýjað, en það rættist sko alldeilis úr því. 26 stiga hiti, sól og blíða. Ég leyfði Örnu og Hjalta að hjóla með mér út í búð áðan, svaka fjör að "lóa" eins og Hjalti segir. Elísa er náttúrulega bara úti að leika og sést varla. Núna langar hana og Karine svo rosalega að kaupa sér alveg eins föt "því þær eru svo miklar pæjur og bestu vinkonur". Híhí, fyndnar. Kannski ég leyfi henni að kaupa eitthvað á morgun, fer eftir hvað ég verð rík eftir lánaborganir og farmiðakaup.

Synd og skömm

2004-06-13T16:30:00.000+02:00

Það er svo frábært veður úti og ég á næturvöktum og sef þetta allt af mér. Buhuhuhu! Ég vona að þetta haldist svona og verði líka um næstu helgi. Þá kannski maður geti skroppið á ströndina aftur ;) Svo væri nú gaman að skella sér einn dag í Tusenfryd. En jæja, það bíður mín víst önnur næturvakt í kvöld :/

Þunn

2004-06-12T20:43:00.000+02:00

Já, ég er pínu þunn. Það var svona fyrirlestradagur í vinnunni í gær og svo út að borða um kvöldið og djamm. Ég er nú ekkert svakalega þunn, en mig langar ekkert svakalega mikið að fara á næturvaktina núna á eftir. En ég slepp víst ekkert undan því. Frábært veður í dag, um 25 stiga hiti, sól og blíða. Hjalti sagði fyrstu þriggja orða setninguna sína áðan, hún var "bíddu gá mamma", en þetta sagði hann við pabba sinn þegar hann ætlaði að setja á drenginn nýja bleiu ;)

BÖRN!!!

2004-06-09T21:13:00.000+02:00

Merkilegt með þessa krakka hvað þau virðast bara stundum halda að pabbi þeirra sé ósýnilegur. Ef þau þurfa eitthvað þá er það alltaf mamma mamma mamma. Maður getur stundum orðið alveg galinn á þessu sko.

Mamma, viltu gefa mér eitthvað að drekka.
Mamma, ég er svolítið svöng.
Mamma, komdu að skeina mig.
Mamma, ég er svo þreytt.
Mamma, viltu kveikja á sjónvarpinu.
Mamma, viltu gefa mér meiri eplasafa.
Mamma, viltu breiða á mig.

*GARG*

Æ, það er samt yndislegt að vera mamma. Svo ef maður er búinn að vera eitthvað pirraður á þessum elskum svona um daginn eða kvöldið, þá er alveg nóg að kíkja bara á þau þegar þau eru sofnuð. Það er alveg lífsins ómögulegt að vera pirraður út í saklaus sofandi börn :D

Svolítið þreytt...

2004-06-09T00:03:00.000+02:00

... en vildi samt skrifa smá. Var að vinna á kvöldvakt og var bara með eitt herbergi, einn sjúkling sem krefst mjög mikils. Hann er með tracheostomiu (hvað heitir þetta nú á íslensku, hmmm, allavegana andar í gegnum gat á barkanum) og heimaöndunarvél sem þarf að kunna svolítið á og fylgjast með. En þetta var svo róleg vakt, ég þurfti eiginlega ekkert að gera. Enda sér þessi sjúklingur um mikið sjálfur bara.

Undur og stórmerki, það gengur bara rosa vel að láta Hjalta Sævar sofna sjálfan :D Frábært, frábært. Loksins gekk þetta ;) Enda strákurinn orðinn stór og farinn að skilja svo margt ;)

Strandferð

2004-06-06T20:42:00.000+02:00

Já við skruppum bara á ströndina í dag í góða veðrinu. Krökkunum fannst það æðislegt og vildu helst ekkert fara heim aftur. Þetta er nú bara í fyrsta skipti sem við skreppum svona á ströndina, enda vorum við ekkert með bíl í fyrrasumar til að gera svona hluti. En það er á hreinu að þetta verður gert aftur. Frábær leið til að skemmta krökkunum og slappa af í leiðinni :D

Frábær dagur :D

2004-06-05T22:32:00.000+02:00

Þetta er sko búið að vera yndislegur dagur. Við lögðum af stað út á Kjøkøy um klukkan hálftvö og vorum nú ekki nema svona 20 mín að keyra þetta. Frábært veður, um 26 stiga hiti og umhverfið þarna á Kjøkøy úti í skerjagörðunum er alveg geggjað. Þessi bústaður sem Karin og Jon eiga er í raun gamalt íbúðarhús, um 150 ára gamalt, sem er búið að vera í ættinni hennar Karinar held ég bara allan þennan tíma. Yndislega eldgamalt hús, að vísu búið að leggja rafmagn, en pípulagnir eru engar. Það er bara einn krani með rennandi vatni sem er fyrir utan húsið og klósettið er svona ekta útikamar. Ekkert smá kjút, hahaha. Elísu og Örnu fannst þetta nú frekar undarlegt klósett og ekki voru þær of hrifnar af lyktinni ;)

Það er frábær garður í kringum húsið og rétt fyrir neðan er pínulítil sæt strönd þar sem krakkarnir voru að sulla smá og moka, skoða marflær og þangflær (eða hvað sem þetta heitir), marglyttur og skeljar, kasta steinum út á sjó (og sumir sem voru frekar litlir og ekki mjög flinkir köstuðu óvart í aðra) og bara skemmta sér. Síðan er fullt af klöppum þarna, sem einmitt einkenna svo skerjagarðana. Svo var farið í vatnsbyssuslag í garðinum, leikið með dót, umhverfið skoðað og krökkunum fannst þetta algjört paradís.

Þegar líða tók á var grillað og borðaður þessu frábæri matur, setið og kjaftað og allir höfðu það rosalega gott. Kannski að undanskilinni Elísu. Hún ætlaði eiginlega ekkert að koma með heldur gista hjá Nikol vinkonu sinni, en svo hringdi stelpuskottan og var orðin slöpp. Þannig að við sóttum hana og hún kom með okkur út á Kjøkøy. Þar var hún greinilega eitthvað að verða lasin og kúrði sig aðallega inni að horfa á sjónvarpið. En hún stóðst nú ekki mátið og kom aðeins út líka, enda bara ekki annað hægt þarna. Að vísu skemmti hún sér mjög vel, en það spillti nú fyrir hvað hún var slöpp. Enda er gellan með yfir 38 stiga hita núna.

En þetta var nú samt alveg geggjaður dagur og þessi staður er ekkert smá flottur. Verð bara að skella inn nokkrum myndum og sýna ykkur.

Gamla húsið (bústaðurinn)

Úti í garði

Á klöppunum

Á ströndinni

Húsið séð frá ströndinni

Útikamarinn góði, lúxusútgáfa sko - með tveimur götum :D

Ég er þokkalega brunnin á bringunni og aftan á hálsinum eftir daginn. Mundi alveg eftir að bera sólarvörn á börnin, en gleymdi sjálfri mér :þ

Gaman gaman!

2004-06-05T12:06:00.000+02:00

Yndislegt veður, mælirinn sýnir tæplega 20 stiga hita í forsælu og það er sól og blíða úti. Hitinn á örugglega eftir að hækka eftir sem líður á daginn. Þvotturinn sem ég hengdi út á snúru fyrir rúmum klukkutíma er orðinn þurr. Við erum á leið í sumarbústaðaheimsókn til Karin og fjölskyldu. Reikna nú ekki með að við gistum, enda er þetta nú bara rétt fyrir utan Fredrikstad. Elísa er reyndar í Halden hjá Nikol vinkonu sinni, fór þangað í gær, og ætlar að fá að gista aðra nótt. Jæja, best að fara að gera liðið klárt :D

Smá föstudagsblaður

2004-06-04T18:04:00.000+02:00

Það er svo notalegt að vera í fríi á föstudögum og eiga alla helgina framundan, var reyndar í fríi í gær líka.

En já, ég var að breyta lúkkinu á síðunni og er bara nokkuð ánægð með þetta ;) Ákvað samt að halda inni gömlu kommentunum hér og nýta mér ekki þetta standard blogger-kommenta-kerfi.

Fór í leikfimi áðan og svo á McDonalds og át þetta allt á mig aftur, haha. Ówell, vonandi ekki alveg.

Ekki var mikil sól í dag en samt hlýtt. Reyndar var bara rigning áðan, en hún er hætt. Elísa var hjá bekkjarsystur sinni áðan og þær veiddu helling af halakörtum sem núna eru í fötu úti í porti. Ef einhver veit hvað halakörtur éta, endilega látið mig vita.

Finding Nemo er afskaplega vinsæl mynd á þessu heimili núna. Verst að við eigum hana bara með enskum texta, en það er í vinnslu að bæta úr því ;) Hlakka til að geta séð hana á íslensku, aðallega fyrir Örnu og Hjalta. Þetta er fyrsta myndin sem Hjalti er voða spenntur yfir. Hann var það nú ekki fyrst, en núna finnst honum rosalega gaman að horfa á Nemo.

Já annars, þetta gekk bara vel með svefninn í gær og drengurinn sofnaði sjálfur án mikilla vandræða. Þá er bara að gera þetta aftur í kvöld.

Svo verð ég bara að sýna ykkur eina sæta mynd af ömmu minni með langömmu börnunum sínum :D

Sumar og sól

2004-06-03T21:43:00.000+02:00

Alveg luvlí veður úti :D Mætti vera svona í allt sumar fyrir mér, ég fíla ekki of mikinn hita. En svona eins og í dag, ca 24-25 stiga hiti, bara fullkomið. En ég á fastlega von á að hitinn eigi eftir að hækka eitthvað þegar á líður sumar.

Við erum með tilraunastarfsemi í gangi, þ.e. að láta Hjalta sofna sjálfan. Ég verð nú að segja að miðað við fyrri tilraunir þá virðist þetta ætla að ganga mjög vel. Hann hefur bara fjórum sinnum komið fram á hálftíma, sem þýðir að meðalvera hans uppi í rúmi (eða réttara sagt inni í herbergi, hann er sko ekkert alltaf í rúminu), er kannski um 5-6 mínútur. Síðast þegar við reyndum þetta þá var þessi tími kannski um 20-30 sekúndur svo þetta er mikil framför ;) Kannski bara gengur þetta loksins *bjartsýn*

Hlakka til að fá orlofið mitt núna 15. júní, þá ætla ég rétt að vona að við getum keypt miðana til Íslands.

Annars virðist aðeins hafa sljákkað í fólki á Barnalandi. Þetta var nú hreinlega ekki eðlileg múgsefjun. Bara gamli miðaldarrannsóknarrétturinn mættur á svæðið með nornaveiðar í fullum gangi. Jæja, vonum að friðurinn haldist eitthvað núna. Mér finnst reyndar mjög gaman að góðum rökræðum og skoðanaskiptum, og jafnvel smá rifrildi. En þetta sem var í gangi núna fór svo langt, langt yfir strikið. Hef aldrei séð það ljótara. Enda var ég bara gáttuð á hvernig manneskjur geta látið. Jæja, það er allavegana rólegt núna... kannski meira að segja of rólegt. Á maður að reyna að koma með eitthvað heitt umræðuefni? Hahahaha :Þ

Ömurlegt fólk

2004-06-01T18:42:00.000+02:00

Mikið er ég fegin að hópurinn sem stundar umræðuna á Barnalandi er ekki þverskurður af samfélaginu, eða ég neita allavegana að trúa því. Ég er bara verulega sorgmædd yfir umræðum s.l. sólarhrings. Mér finnst sorglegt hvað það er til mikið af hörðu og skilningslitlu fólki, fólk með svakalega fordóma, fólk sem dæmir hluti sem það hefur engan skilning á, fólk sem hefur enga samúð með þeim sem hafa stigið feilspor eða eiga við vandamál að stríða, getur engan vegin sett sig í spor þeirra og hreinlega neitar að reyna það einu sinni. Ég fékk eiginlega bara smá sjokk við að sjá þetta svona svart á hvítu hvað margir eru tilbúnir að dæma hart og sýna enga miskunn.

Einnig finnst mér ótrúlegt hvað fólk leyfir sér í nafni mál- og skoðanafrelsis. Það er eins og þeir haldi að þetta frelsi gefi þeim leyfi til að segja hvað sem er og það þurfi enga ábyrgð taka á þessum orðum sínum. Sumir hafa bara hreinlega engin mörk og láta allt flakka í nafnið skoðanafrelsisins og slengja svo bara um sig þessum gullna frasa "ég má alveg hafa mína skoðun" *æl*. Skilur þetta fólk virkilega ekki að orð geta haft afleiðingar? Hefur það enga siðferðiskennd varðandi þetta? Hversvegna leyfa sumir sér bara að segja allt og halda að það sé í besta lagi af því að "þetta er bara þeirra skoðun"? Svo er þetta sama fólk kannski að hneykslast á DV og öðrum fjölmiðlum um hversu siðlausir þeir eru og leyfa sér að birta bara hvað sem er án þess að taka tillit til þeirra sem að málinu koma.

Já, ég er bara sorgmædd yfir þessu. Sem betur fer eru vinir mínir ekki svona, kann kannski að velja þá vel.

Bleeeee!

2004-05-29T20:15:00.000+02:00

Oh hvað ég er eitthvað andlaus í dag. Bara nenni engu, leiðist bara og dettur ekkert í hug að gera. Elísa hefur varla sést hér í dag, rétt kom inn áðan og rauk út aftur. Svo hangir maður bara inni með hina krakkana af því að maður nennir engu. En við fðrum nú í ferminguna hjá Irmu á morgun. Þau eiga heima í Moelv, hugsa að þetta sé svona 3-4 tíma keyrsla. Svo kom Karin vinkona með þá hugmynd að við myndum fara í bústað, sem þau eiga, um næstu helgi. Hann er stutt frá Fredrikstad, minnir að hann sé á Kjøkøy. Það væri nú gaman. Vona bara að þær mæðgur, Karin og Sunniva verði þá búnar að jafna sig af veikindunum. Blebb blebb, best að halda áfram að láta sér leiðast. Enginn á MSN, varla neitt í gangi á Barnalandi og stelpurnar í yahoogrúppunum mínum virðast bara allar hafa skroppið í sumarbústað um helgina.

Nostalgía

2004-05-28T01:31:00.000+02:00

Ég er í einhverju nostalgíukasti. Bjöggi var að skanna inn gamlar myndir, m.a. frá því að ég var ólétt af Elísu og af Elísu pínulítilli. Ji hvað ég man eftir hvað hún var ofboðslega fallegt ungabarn. Sjáið bara þetta bjútí:

Hér eru svo fleiri myndir frá þessu tímabili ef einhver vill skoða:

Elísa Auður beibí ;)

Lælælæ!

2004-05-26T23:20:00.000+02:00

Það styttist í ferminguna hennar Irmu, það er ekkert smá að gerast núna í maí. En það verður gaman að skreppa og heimsækja Inga og co, höfum bara aldrei komið til þeirra.

Það er stuð á Barnalandi núna sem svo oft áður, ýmis ágreiningsmál í gangi og Qmen enn sem áður í brennideplinum, þetta er nú alveg stórfurðuleg manneskja. Held að henni hljóti að leiðast voða mikið heima hjá sér.

En jæja, ég hef voða lítið að segja, ætla bara að skella mér í bað og skola af mér skítinn... og slappa af :D

Svarti Pétur

2004-05-25T09:50:00.000+02:00

Bara brjáluð rigning úti, jahérna hér. Og ég sem hélt að sumarblíðan væri komin aftur.

En annars eitt ferlega fyndið. Ég skrifaði innlegg á Barnaland í gær og sýndi þeim myndina af Hjalta þar sem hann er svona skítugur eftir torfæruna. Ein af þeim sem svaraði sagði að kallinn hennar hefði verið á kepnninni ásamt félögum sínum og hefðu vel munað eftir þessum litla púka... þeir kölluðu hann Svarta Pétur. LOL!!! Það nafn hæfði honum sko VEL eins og hann var þarna ;D

Afmæli afmæli afmæli

2004-05-24T18:08:00.000+02:00

Annar í afmæli

Eða kannski þriðji. En Hjalti fékk sko pakka í póstinum í dag. Einn frá ömmu og afa í Borgarnesi og einn (reyndar tvo) frá ömmu og afa í Kópavogi og einn frá Heiðu og Birni. Stelpurnar fengu líka sinn hvorn lítinn pakka frá ömmu og afa í Kópavogi. En Hjalti fékk svaka flotta lest með kalli í frá ömmu og afa í Borgarnesi, ásamt skemmtilegri bók. Svo frá ömmu og afa í Kópavogi fékk hann Bugga byggi dót ásamt sætum stuttermabol. Frá Heiðu og Birni fékk hann síðan bók um dýrin :D Svo fengu þau krakkarnir saman einhverja myndabók um risaeðlurnar, litabók og leikjabók, svona litlar ;) Elísa og Arna fengu líka stuttermaboli frá ömmu og afa í Kópavogi. Hjalti er svakalega ánægður með dótið sitt ;) Já og svo kom fullt af nammi með og harðifiskur, bæði frá ömmu og afa í Borgarnesi og í Kópavogi.

TORFÆRA

2004-05-24T10:16:00.000+02:00

Jæja, við skelltum okkur sko á torfæru í gær. Lögðum af stað frá Fredrikstad svona um ellefu og vorum komin til Vormsund, þar sem torfæran var, um eittleytið. Frábært veður alveg, smá vindur inn á milli reyndar, en glampandi sól. Við byrjuðum á að labba niður í pitt og gá hvort við fyndum einhverja af þessum Íslendingum sem ég þekki. Rakst þar fyrst á Ellu, eða hún gargaði á mig ;) Svo fann ég Sigga og Sigfús, sem hefur nú AAAAAÐEINS stækkað frá því að ég sá hann síðast. Komst svo að því að gaurinn er að verða 17 ára... OMG sko, hann var bara kríli þegar ég var mest með Sigga og Erlu. Greinilega allt of langt síðan ég hef hitt þau. Stjáni kallinn hennar Ásdísar var þarna auðvitað líka, Guðni bróðir hans Sigga og fleira fólk. Erla var hins vegar einhversttaðar á vappi og ég fann hana ekki strax, en í pásunni þá hitti ég loks á hana :D Meiriháttar alveg að hitta þessar elskur aftur :D :D :D :D. Svo ætlaði ég að taka mynd af Hjalta í torfærubílnum hans Sigga, en litla skræfan harðneitaði þegar á hólminn var komið. Það var voða gaman að fylgjast með bílunum úr fjarlægð, en þeir voru allt of ógnvekjandi svona nálægt, hahaha. En Elísa var ekki lengi að vippa sér undir stýri, svo ég tók bara mynd af henni þar ;) Set þetta inn á barnalandssíðurnar þegar ég hef orku.

Það var svo hrikalega mikill sandur þarna og bílarnir náttúrulega spændu þetta upp. Sumar myndirnar sem ég tók af bílunum sýna enga bíla heldur bara sandský ;) En ég náði þessari af Sigga í síðustu þrautinni, rétt áður en hann KÚTVELTIST niður brekkuna, heh!

Já, sandurinn. Púff, þið hefðuð átt að sjá okkur, maður var orðin ein sandhrúga. En það var nú ekkert miðað við Örnu og Hjalta. Þau sátu nú bara, eða þá lágu og veltu sér í sandinum, grófu og léku sér, helltu sandi yfir hvort annað og voru bara búin að breytast í sandkarla. Hjalti var líka að smakka á sandinum og fannst hann bara góður held ég. Maður var hættur að sjá hinn rétta háralit á þeim, þau voru bara orðin svona skemmtilega sandgráhærð. Hjalti var þó heldur verri en Arna. Ef ég rótaði aðeins í hárinu á honum þá bara þyrlaðist upp sandský. Það hefði verið heppilegast að hengja þau upp á snúru og banka sandrykið úr þeim með teppabankara... en ég lét mér nægja að reyna að dusta af þeim þegar torfæran var búin. Svona leit nú sonurinn út eftir keppnina og Arna var lítið skárri.

Það þarf varla að segja frá því að liðið var sett í BAÐ þegar heim var komið, þrátt fyrir að klukkan væri að verða hálfellefu. Það var bara ekki hægt að setja þau í rúmið með allan þennan sand, híhí.

En þetta var svakalega skemmtilegur dagur og ekki síst vegna þess hvað það var gaman að hitta Sigga og Erlu og það lið aftur. Verst að það fór alveg framhjá mér í hvaða sæti Siggi lenti, held að hann hafi kannski lent í þriðja. Þessir Norðmenn eru alltaf svo seinir í öllu svo þeir eru ekki einu sinni komnir með úrslitin á netið. Við nefninlega fórum áður en úrslitin voru kunn, vorum með þrjú ansi þreytt börn ;) En Ásdís mín, ég treysti bara á að þú segir mér í hvaða sæti kappinn lenti, býst við að kallinn þinn viti það nú ;D

Ég á stóran strák :D

2004-05-22T17:58:00.000+02:00

Húrra húrra, þetta var skemmtilegur dagur. Hjalti varð tveggja ára og auðvitað var veisla. Fékk Sísí og fjölskyldu í heimsókn, það var alveg frábært að hitta hana loksins, og þau öll. Ketil og Arna urðu mestu mátar og léku sér voða vel saman. Svo komu Palli og Helga með börnin sín þrjú, sú yngsta er á sama ári og Hjalti nema bara fædd í október, þannig að það var svaka stuð hér. Gaman að fá þau líka, þetta er í annað skiptið á tveimur árum sem þau kíkja í heimsókn, haha. Og svo býr maður rétt hjá þeim. Hrikalega er maður lélegur að kíkja í heimsókn og bjóða í heimsókn. Karin og hennar fjölskylda komust því miður ekki þar sem Sunniva litla var veik með 40 stiga hita. En pabbi hennar skaust samt hingað með pakka handa Hjalta, voða almennilegt af þeim. Þau verða bara að kíkja í heimsókn seinna.

En Hjalti fékk þennan fína steypubíl, með kubbum innan í, frá Ketil, flottan bíl frá Elísu og Örnu, glæsilegan stóran traktor með kerru frá Sunnivu og skemmtilegt sandkassadót frá Birgi, Láru og Maríu. Hann var sko alsæll með allt þetta dót, fullt af "stráka"dóti :D Svo var hann auðvitað búinn að fá þríhjól frá okkur pabba hans.

Nú eru allir frekar þreyttir. Hjalti er ekkert búinn að taka sér síðdegisblund í dag og er ansi sybbinn, en það tekur því bara ekki að fara að láta hann leggja sig núna, klukkan 18. Arna er að horfa á Dinosaur inni í herbergi hjá Elísu og Elísa er að tala við Karine á MSN ;)

Leirburður ;)

2004-05-20T23:36:00.000+02:00

Hausverkur og hálsa-ó
hérna mig að angra er.
Þvottahrúgan verri þó
þykir satt að segja mér.

Húsmóðir ég harla er,
heimilið er algjört flag.
Veisluhöld þó verða hér
vonandi á laugardag.

Yngsti litli anginn minn
afmæli nú bráðum á.
Sæti litli strákurinn
skal víst sína veislu fá.

Að taka til því tel ég best,
tuskan verður vopn mitt nú.
Þá get ég fengið margan gest
og glöð mun verða þessi frú.